Астанада «Абыл мен Қабыл» романының таныстырылымы өтті
Бүгін «Astana Eurasian Book Fair-2024» VII халықаралық кітап-жәрмеңкесі аясында жазушы Мақсат Мәліктің «Абыл мен Қабыл» романының тұсаукесері өтті, деп хабарлады Elorda.info.
Роман Қазақстан Жазушылар одағы мен «BELES» құрылыс компаниясы ұйымдастырған «Жас қалам – жаңа роман» жобасымен аз уақытта жазылды.
ЭКСПО Конгресс орталығында өткен кітаптың тұсаукесеріне ақын-жазушылар және кітапсүйер қауым қатысты.
Жастар арасында жаңашылдығымен танылған автор Мақсат Мәліктің «Абыл мен Қабыл» романы төрт бөлімнен тұрады. Шығармада сиам егіздерінің 33 жылдық ғұмырын жан-жақты талдап жазған.
«Абыл мен Қабыл» – сиам егіздері туралы роман. Негізі, «Абыл мен Қабыл» деген аңызды көбіміз жақсы білеміз. Бірақ шығарманы тікелей осы аңыздың негізінде жазылған деуге келмейді, дегенмен контекстері де бар. Кітапта сиам егіздерінің бір күндік оқиғасы төрт бөлімнен тұрады: таңсәрі, талтүс, кешқұрым және түн қараңғысы. Бір күннің оқиғасы арқылы үш-төрт линияда сиам егіздерінің отыз үш жылдық ғұмыры бейнеленеді. Одан өзге шығармада түрлі психологиялық қақтығыстар бар. Мұның барлығын оқырман кітапты қолына алып оқығаннан кейін өзінше түйіндей жатар. Шығармадан екеудің арасындағы психологиялық айқастың соңында кім жеңеді, адамның миссиясы қандай деген секілді көптеген сауалға жауап іздеуге болады, – дейді роман авторы М.Мәлік.
Айта кетейік, іс-шара соңында жазушы оқырмандардың сұрақтарына жауап берді.