Бюджет қаржысын жұмсауды емес, тиімді игеруді ойлауымыз керек – сенатор

Жиында Қаржы және бюджет комитетінің төрағасы Сұлтанбек Мәкежанов бюджет қаражатын тиімді игеру туралы айтты, деп хабарлады Elorda.info inbusiness.kz-ке сілтеме жасап.

Еліміз Тәуелсіздік жылдарында мемлекет қаржысын тиімді басқаруға бағытталған және еліміздің әлеуметтік-экономикалық дамуының басым міндеттерін жүзеге асыруға бағытталған заманауи бюджет жүйесін құруда үлкен жолдан өтті. Тұтастай алғанда, бюджет заңнамасын және бюджет процесін жетілдіру бойынша жұмыс жалғасуда және одан әрі экономикалық және әлеуметтік реформалардың табыстылығы көп жағдайда мемлекеттік қаржыны басқарудың Мемлекет басшысы алға қойған жаңа міндеттерге қаншалықты жауап беретініне байланысты, - деді спикер. 

Бұл ретте ол алға қойылған міндеттерді ескере отырып, бюджет жүйесін реформалау мемлекеттік шығыстардың тиімділігін арттыруға, Ұлттық қор қаражатын ұтымды пайдалануға, мемлекет қаржысының теңгерімділігін қамтамасыз етуге бағытталуы тиіс екенін айтты. 

Ал бұл тәсілдерді тиімді жүзеге асыру жаңа Бюджет кодексінде көрініс табуы тиіс. Ал жаңа Бюджет кодексі аясында қандай негізгі тәсілдер мен міндеттер белгіленетінін, оның ерекшеліктері қандай болатынын түсіну үшін Парламент Сенатының Қаржы және бюджет комитеті Бюджет кодексін реформалау мәселелері бойынша дөңгелек үстел өткізуге бастамашы болды, - деді комитет басшысы.