Оңтүстік Корея Қазақстанның лифт саласына 30 миллион доллар қаржы құяды

Астанадағы Техникалық колледжде оқу орнының әкімшілігі Оңтүстік Корея инвесторларымен Қазақстанда лифт шаруашылығын дамыту мәселелері бойынша кездесу өткізді, деп хабарлады Elorda.info.

Оңтүстіккореялық Ofe Elevators компаниясы технологиялар трансфері, құрылыс жабдықтарымен қамтамасыз ету және қызмет көрсету, зерттеу, әзірлеу және оқыту іс-шараларын жүргізумен айналысатын лифт орталығының құрылысында ынтымақтасуға дайын екендігін білдірді.

Ofe Elevators компаниясының президенті Хам Ен-Чхердің айтуынша, жоба Алматы облысының аумағында көтергіш және лифт жабдықтары үшін өнеркәсіптік парк құруды көздейді, ал елордада өндірістік тәжірибені қамтамасыз ете отырып, білікті мамандарды даярлау бойынша кәсіби техникалық орталық құру жоспарланған.

Біз Техникалық колледждің базасында кездесу өткіземіз, өйткені мұнда «Лифт шаруашылығы және эскалаторлар» мамандығы бойынша қызметкерлер даярланады. Негізгі міндет – Оңтүстік Корея тарапы ашуды жоспарлап отырған мамандарды даярлау жөніндегі кәсіби техникалық орталықты елордада жергілікті оқу орнының қатысуымен іске қосу үшін біздің күш-жігерімізді біріктіру. Оқыту тек студенттер үшін ғана емес, лифт саласында жұмыс істейтін қызметкерлер үшін де қарастырылған, - деп хабарлады Қазақстан лифт компаниялары қауымдастығы төрағасының орынбасары Владимир Табашнюк.

Қазіргі уақытта отандық компаниялар Қытай мен Беларусьтен бюджеттік лифт өндірушілермен, сондай-ақ танымал маркалар брендімен лифт шығаратын заңсыз цехтармен бәсекелесуге мәжбүр. Мұндай лифтілер зауыттық аналогтардан төмен бағамен сатылады және сапасы төмен. Оларды орнатқаннан кейін қарапайым тұрғындар осы жабдықты жөндеуге немесе ауыстыруға айтарлықтай шығындар алады.

Біз Қазақстандағы өндіріс тек Орталық Азия өңіріне ғана емес, еуропалық нарыққа да бағытталатын болады деп есептейміз. Сонымен қатар біз «Қазақстанда жасалған» маркасын барлық жерде дамыту үшін бар күшімізді саламыз, - деп мәлімдеді Ofe Elevators компаниясының президенті.

Жоба «R&D паркі» деп аталды. Оның құны 30 миллион доллардан асады, сондай-ақ 200 жұмыс орнын құру жоспарлануда. Жобаны іске асыру мерзімі – 2023 жылдан 2026 жылға дейін.