Ең қымбат ет Алматыда, сүт өнімдері Шымкентте

2021 жылғы қыркүйекте инфляция 0,4%-ды құрады. Азық-түлік тауарларының бағасы бір айда 0,1%-ға, азық-түлік емес тауарларға - 0,6%-ға, ақылы қызметтерге - 0,7%-ға өсті. Жылдық мәнде инфляция 8,9%-ды құрады.

Өңірлер бөлінісінде жылдық инфляция 13 өңірде жеделдеді, 3 өңірде баяулады, ал 1 өңірде бағаның өсу қарқыны өзгеріссіз қалды. Ең көп баяулау Павлодар облысында тамыз айында 9,2%-дан қыркүйекте 8,8%-ға дейін тіркелді. Ең көп үдеу Қызылорда облысында байқалады (8,2%-дан 8,8%-ға дейін). Жылдық инфляция 6 өңірде жалпы республикалық деңгейден жоғары болды, олардың ішінде ең үлкен мән Маңғыстау облысында тіркелді (9,8%). 

Қазақстанда азық-түлік тауарлары жылдық мәнде 11,5%-ға қымбаттады. Ең төменгі өсім Шығыс Қазақстан (10,5%) және Солтүстік Қазақстан (10,6%) облыстарында, ең жоғары - Маңғыстау облысында (13,1%) байқалды.

Ел бойынша азық-түлік емес тауарлардың бағасы 7,5%-ға өсті. Ең жоғарғы өсім Атырау және Ақтөбе облыстарында (8,0%-дан), ең төмені Павлодар облысында (6,8%) тіркелді.

Ақылы қызметтер 6,8%-ға қымбаттады. Бұл ретте ең жоғары өсім Ақтөбе және Жамбыл облыстарында (8,0%-дан), ең төмен - Алматы және Қызылорда облыстарында (6,1%-дан) байқалды.

Алматыда ет және ет өнімдері бағасының ең жоғары өсуі (3,2%-ға) тіркелді. Атап айтқанда, сиыр (5,3%-ға) мен жылқы еті (4,0%-ға) қымбаттады. Олардың бағасы тұтастай ел бойынша тиісінше 1,6%-ға және 1,4%-ға өскен. Атырау облысында жылқы етінің (3,5%-ға) және өңірлер арасында құс еті бағасының ең жоғары өсуі (4,5%-ға) тіркелді.

Шымкентте сүт өнімдері (2,3%-ға, ел бойынша 0,9%-ға өсу кезінде), атап айтқанда пастерленген сүт (3,0%) және қаймақ (2,5%) қымбаттады. Ал осы тауарлардың бағасы ел бойынша тиісінше 1,1%-ға және 1,2%-ға өсті.