1 қазанда мүлік салығын төлеу мерзімі аяқталады

Астана қаласының коммуникациялар қызметінде жеке тұлғаларға салық салу туралы брифинг өтті, деп хабарлады Elorda.info.

Брифингте Астана қаласы бойынша МКД өндірістік емес төлемдер басқармасының басшысы Ерлан Бакиров пен Астана қаласы бойынша МКД өндірістік емес төлемдер басқармасының жалпыға бірдей декларациялау және өндірістік емес төлемдер бөлімінің басшысы Ерасыл Бораш болды. 

2023 жылдың 1 қазанында жеке тұлғаларға 2022 жылға мүлік салығын төлеу мерзімі аяқталады.

Жеке тұлғаларға салық салу объектілері бойынша салықты есептеуді салық органдары салық төлеушінің тұрғылықты жеріне қарамастан, салық салу объектісінің орналасқан жері бойынша есепті салық кезеңінен кейінгі жылдың 1 шілдесінен кешіктірмей, құқығы болған жеке тұлғалардың салық салу объектілері бойынша меншік құқығындағы нақты иелену мерзімін ескере отырып, салық базасына тиісті салық мөлшерлемесін қолдану жолымен жүргізеді, - дейді Ерлан Бакиров. 

2022 жылы елордада мүлік салығы 424 мың жеке тұлғаға есептелді, бұл 3,7 млрд теңгені құрайды. Алайда, бүгінгі таңда 189 мың адам салық төлемеген, оның жалпы сомасы 1,3 млрд теңге.

2 қазаннан бастап борышкерлерге берешек туралы хабарлама жіберілетін болады. Егер берешек сомасы 1 АЕК-тен асатын болса, хабарлама тапсырылғаннан кейін 30 жұмыс күні өткен соң берешекті мәжбүрлеп өндіріп алу туралы салық бұйрығы жасалады.

Астана қаласы бойынша Мемлекеттік кірістер департаменті жеке тұлғалардың автөкөліктерге салынатын салық бойынша берешекті өндіріп алу мақсатында Астана қаласының Полиция департаменті жедел басқару орталығына «Қорғау» және «Сергек» жүйесіне 2 млрд теңге сомасына 4 248 көлік құралын енгізді.