Әшімбаев: Балаларды кибербуллингтен қорғау – маңызды міндеттердің бірі

Бюро мүшелері алдағы 14 сәуірде өтетін отырыстың күн тәртібін бекітті. Сенаттың кезекті отырысында депутаттар «Қазақстан Республикасының кейбір заңнамалық актілеріне баланың құқықтарын қорғау, білім беру, ақпарат және ақпараттандыру мәселелері бойынша өзгерістер мен толықтырулар енгізу туралы» заң жобасын қарайтын болады. Бұл құжат балаларды оларға қатысты кез келген зорлық-зомбылықтан, оның ішінде отбасылық қатынастар, білім беру және ақпарат салалары бойынша қорғау тетіктерін жақсартуға арналған.

Балаларды буллингтен және кибербуллингтен қорғау маңызды міндеттердің бірі. Бұл заң жобасының кейбір нормалары қоғамда қызу талқыланғанын жақсы білемін. Кез келген заң жобасын талқылау кезінде халықтың осындай белсенділігі үлкен маңызға ие. Қазіргі таңда сенаторлар ұсынылған нормаларды мұқият зерттеп, барлық пікірді ескеріп, жұмыс істеп жатыр. Басты міндет – балалардың құқығын қорғайтын сапалы заң қабылдау. Бұл ретте қоғамның пікірін елеусіз қалдыруға болмайтыны сөзсіз. Өйткені заң жобасы «Халық үніне құлақ асатын мемлекет» тұжырымдамасына қайшы келмеуі керек, – деді Мәулен Әшімбаев.

Сонымен қатар бейсенбіде өтетін жиын барысында Төтенше жағдайлар министрі Юрий Ильиннің көктемгі су тасқыны бойынша еліміздегі ахуал туралы баяндамасы тыңдалады.

Айта кетейік, өткен аптада сенатор Сергей Ершов осы тақырыпқа байланысты депутаттық сауал жолдап, еліміздегі гидротехникалық нысандардың жартысына жуығы апаттық жағдайда тұрғанына назар аударған еді. Осыған орай Сенат спикерінің бастамасымен алдағы отырысқа Төтенше жағдайлар министрін шақыру жөнінде шешім қабылданды.