Елордада бойжеткен мас күйінде такси көлігін айдап кеткен

Астана қаласы Байқоңыр аудандық Полиция басқармасының криминалдық полиция қызметкерлері көлікті айдап әкетіп, жол-көлік оқиғасын жасаған 31 жастағы қала тұрғынын ұстады, деп хабарлады Elorda.info.

Елордалық Полиция департаментінің мәліметінше, оқиғаға қыз бен жігіттің арасындағы жанжал себепші болған.

Тергеу барысында анықталғандай, күдікті таңғы уақытта жас жігітпен таксиде кетіп бара жатып екеуінің араларында келіспеушілік туындайды. Содан такси жүргізушісі жанжалға байланысты екеуін де автокөліктен түсіріп тастаған. Сол кезде жас жігіт такси жүргізушісімен ерегесіп қалады. Екеуі мәселені өзара шешпекші болып сөйлесуге бөлек шыққан сәтті пайдаланған бойжеткен LADA Granta маркалы автокөлігінің рөліне отырып, айдап кеткен. Алайда ол көп ұзамай Иманов пен Асан Қайғы көшелерінің қиылысында екі автокөлікпен соқтығысады.

Қазір аталған дерекке қатысты сотқа дейінгі тергеу амалдары жүргізілуде. Астана қаласының полиция департаменті азаматтарға қырағы болуды, бейтаныс адамдарға сенбеуді ескертеді.