Астанада 4 мектеп пен 3 орталықта инклюзияны қолдау кабинеттері ашылады

Қала әкімінің айтуынша, балабақшалар мен мектептерде инклюзияны қолдау кабинеттерінің санын арттыру жалғасады. Мәселен, «Болашақ» қорымен бірлесіп, 8 балабақшада инклюзияны қолдау кабинетін ашып, жабдықталды. Жуырда тағы 3 шағын орталықта осындай кабинеттер ашылады.

Негізгі уақытта балалар қатарластарымен бірге қарапайым топтарда болады және күніне бірнеше сағат инклюзияны қолдау кабинетінде педагог-ассистенттермен бірге оқиды. Кабинетте ерекше білім беру қажеттіліктері бар балаларды әлеуметтендіру, сөйлеу, коммуникативтік және тұрмыстық дағдыларды қалыптастыру жұмысы жүргізіледі.

№95 «Алматы» балабақшасындағы инклюзияны қолдау кабинетінің қызметімен таныстым. Ерекше балалардың ата-аналарымен, балалар инклюзиясы мәселелерімен айналысатын ҮЕҰ өкілдерімен спорттың қолжетімділігі, кәсіптік бағдарлау даярлығы, білім беру мекемелерінде инклюзияны қолдауға арналған қосымша кабинеттер ашу мәселелерін талқыладық, ынтымақтастықтың алдағы жоспарларын белгіледік, - деді Жеңіс Қасымбек.

Тәрбиешілер мен ата-аналардың айтуынша, инклюзияны қолдау кабинеттеріне барған балалар әлеуметтену және оқыту дағдыларын айтарлықтай жақсартты.

Мектептерде инклюзияны қолдау кабинеттерінің санын арттырамыз. Қазір 29 мектепте бар. Биыл тағы 4 мектепте ашуды жоспарлап отырмыз, - деп қорытындылады қала басшысы.