Елордадағы екі аудан толығымен газдандырылды

Елордада жекеменшік секторды газдандыру жұмысы жүріп жатыр. Қазір Алматы, Сарыарқа аудандары толығымен газдандырылды. Осы мақсатта 680 км-ден астам газ тарату желісі салынды, бұл желілер 9 елді мекенге жеткізілді. Ал қалған екі аудан бойынша жұмыстар кезең-кезеңімен жүзеге асырылады.

Газдандыру жұмысы қаланың экологиясына оң әсерін тигізеді. Өздеріңіз білетіндей, ауа температурасы төмендеген күндері қаланы қою түтін тұмшалап тұрады. Бұл – жекеменшік секторлар жаққан көмірден пайда болатын түтін. Қала экологиясының айтарлықтай жақсаруы үшін жекеменшік секторлар толықтай газға көшуі тиіс. Қазір 3 мыңға жуық отбасы өз үйіне газ орнатты. Бұл осынша отбасы газ жақпайды дегеннің белгісі. Бұл – шамамен 40 мың тонна көмір. Газға қосылатын үйлер саны күн санап көбейіп келеді. Сол сияқты ЖЭО-1 және ЖЭО-2-дегі барлық су жылыту қазандығын газға ауыстырдық, – деп жазды А.Көлгінов.

Елорда әкімі жұмыстың маңызды бөліктерінің бірі – әлеуметтік аз қамтылған отбасыларға қолдау көрсету екендігін және газдандыру жұмысы басталғалы осы санаттағы отбасыларға арнап үйін газға көшіру үшін әлеуметтік көмек көрсету тетігін енгізгендігін жеткізді.

Осы санаттағы отбасыларға бүгінге дейін 90 АЕК мөлшерінде қаржылай көмек көрсетіліп келген – бұл 260 мың теңгеден астам соманы құрайды. Енді әлеуметтік көмек мөлшерін 130 АЕК-ке дейін, яғни 400 мың теңгеге дейін арттыруды жоспарлап отырмыз. Бұл бастама жақын арада қалалық мәслихаттың қарауына енгізіледі, – деді қала әкімі.

Қаланы газдандыру жұмысы тікелей Мемлекет басшысының бақылауында.