Елордада ИНДИГО электронды порталына 50 мыңға жуық бала тіркелген

Фото: қалалық әкімдіктің ресми сайтынан

Астанада жалпы 69 953 баланы қамтитын 546 мектепке дейінгі білім беру нысаны бар, деп хабарлады Elorda.info қалалық әкімдіктің ресми сайтына сілтеме жасап.

Бүгінгі таңда ИНДИГО электронды порталында жалпы білім беру кезегі тіркелді:

- 0 жастан 6 жасқа дейін-мектеп жасына дейінгі 47 899 бала;
- 2 жастан 6 жасқа дейін – 37 596 бала.

Елордада 352 баланы қамтитын 3 арнайы балабақша жұмыс істейді, интеллект, көру, есту қабілеті бұзылған, психикалық дамуы тежелген және сөйлеу қабілеті нашар балаларға арналған 24 арнайы топта 506 бала арнайы білім алады, 78 мектепке дейінгі ұйымдарда 1004 баланы қамтитын инклюзивті білім беру топтары ашылған. Ерекше білім беру қажеттіліктері бар балалар ИНДИГО электронды жүйесінде, арнайы мектепке дейінгі ұйымдарға, балабақшалар жанындағы түзету және санаторий топтарына жолдама алады. Осы кезеңдегі жағдай бойынша түзету кезегінде жүйеде арнайы білім алуға мұқтаж 964 бала тіркелген, - деді Астана қаласы Білім басқармасы басшысының орынбасары Серік Әділбаев.

Оның ішінде ерекше білім беру қажеттіліктері бар балалар үшін елордада 8 психологиялық-медициналық-педагогикалық консультация жұмыс істейді. Осылайша, балалар психологиялық-педагогикалық түзетудің 4 кабинетінде, 2 оңалту орталығында және «Асыл Мирас» Аутизм орталығында психологиялық-педагогикалық қолдау алады.

Айта кетейік, 2024 жылғы 1 қаңтардан бастап ПМПК-да тексеруге жазылу birge.astana.kz сайтында жүзеге асырылады.

Сондай-ақ «Әрбір бала мектепке лайық» жобасы аясында 8 балабақшада эмоционалды-ерікті саласы бұзылған және мінез-құлқы (аутизм) бұзылған балаларға жалпы 90 баланы қамтитын инклюзияны қолдау кабинеттері ашылды.

Алдағы уақытта балабақшаларда қосымша инклюзияны қолдау кабинеттерін №35, №63, №86, №98, сондай-ақ №8, №30, № 76 үш шағын орталықтың жанында ашу жоспарлануда.

Сонымен қатар 1 қыркүйектен бастап жұмыс істеп тұрған 20 мектепке дейінгі ұйымда 120 баланы қамти отырып, ерекше білім беру қажеттілігі бар балаларға арналған қосымша инклюзияны қолдау кабинеттерін ашу жоспарлануда.