Азиядағы алғашқы жартылай марафонда елордалық спортшылар жеңіске жетті

Алматыда жетінші рет ұйымдастырылған жартылай марафон өз мәресіне жетті, деп хабарлады Elorda.info.

Астана қаласы Дене шынықтыруы және  спорт басқармасы таратқан мәліметке сүйенсек, марафон аясында зияткерлік дамуы бұзылған спортшылар арасында жүгіру бойынша әлем чемпионаты (Virtus World Half Marathon & 10K Road Race Championships 2024) ұйымдастырылды. Оған 8 елдің спортшылары яғни, Португалия, Болгария, Жапония, Польша, Қытай, Испания, Швеция және Қазақстан қатысты.

Қазақстан атынан алты спортшы өнер көрсетті. Оның бесеуі Астана қаласының спортшылары. Атап айтқанда, Әмір Алпамыс, Дастан Ордабай,  Ерсайын Хасенов, Алдияр Асқаров пен Азамат Әшірбай.

8 мыңнан астам қатысушы әл-Фараби даңғылындағы Тұңғыш Президент саябағынан бастап Орталық стадионға дейін жүгірді.

Айтулы әлем чемпионатында Астана қаласының екі спортшысы 10 шақырымды бағындырып, жеңіс тұғырынан көрінді. Дәлірек айтсақ, ii3 санатында өнер көрсеткен Дастан Ордабай 47 минут 41 секунд ішінде жүгіріп өтіп алтыннан алқа тақты. Ал, Азамат Әшірбай  51 минут 48 секунд ішінде жүгіріп күміс жүлдегер атанды.

Іс-шараны «Бірінші болу батылдық» қоры мен Алматы қаласы әкімдігінің қолдауымен ұйымдастырды.