Елордада қысқы спорт маусымы шаңғы тебумен басталды

Бүгін Астанадағы шаңғыроллер тас жолында қысқы спорт маусымы салтанатты түрде жалауын көтеріп, шаңғы жарысымен ашылды, деп хабарлады Elorda.info, елорда әкімдігінің сайтына сілтеме жасап.

Шаңғы жарысы бірнеше жас ерекшеліктері бойынша 500 метр және 5 км қашықтықта өтті.

Фестивальдің ашылу салтанатында сөз алған Астана қаласының Дене шынықтыру және спорт басқармасы басшысының орынбасары Еркеғали Корбозов жиналғандарды шаңғы мерекесімен құттықтады.

Астанада шаңғы спорты кең өріс алған. Осындай жарыстарды ұйымдастыру дәстүрге айналып жыл сайын қолдау көрсетіліп келеді. Бұл халықтың қысқы спорт түрлеріне деген қызығушылығының артуына ықпал етеді. Сондықтан бүгінгідей бұқаралық сипат алып отырған шаңғы мерекесінің маңызы зор. Баршаңызды келе жатқан Жаңа жыл мерекесімен және қысқы спорт маусымының ашылуымен шын жүректен құттықтаймын"- деді Е. Корбозов.

Айтулы шараға 500-ге жуық қала тұрғындары мен қонақтары жиналды. Мерекелік шарада еңбектеген баладан еңкейген кәріге дейін шаңғы тепсе, енді бірі гір тасын көтеруге, қол күресіне, арқан тартыс және белбеу күресіне қатысып өз бақтарын сынады.

Сондай-ақ, мерекелік шара аясында көрермендер мен қатысушылар арасында лотерея ұйымдастырылып, бағалы сыйлықтар ойнатылды.

Әр жас тобының жеңімпаздары мен жүлдегерлері дипломдармен, медальдармен және бағалы сыйлықтармен марапатталды.