Гүлдің солып қалмауына көмектесетін амалдар қандай

Марганцовка ерітіндісі

Марганцовка антисептик, дезодоратор қасиеттеріне ие. Гүл сауытындағы суға сәл ғана марганцовка қоссаңыз, микробтар мен бактерияларды өлтіріп, гүліңіздің ғұмырын ұзарта түседі. Тек судың ашық алқызыл түсті болуына мән беріңіз, 5 литр суға 1 г кристалл жеткілікті. Сонымен қатар гүлді суға салмай тұрып марганцовка толығымен ерігеніне көз жеткізіңіз. Әйтпесе адам секілді гүлдер де күйіп қалуы мүмкін. Зарарсыздандыру мерзімі 3-4 күнге жетеді.

Белсендірілген көмір (активированный уголь)

Ол судағы артық микроэлементтерді жояды, соның арқасында су біраз уақыт таза болып тұрады. Бір құты суға бір таблетка белсендірілген көмір жеткілікті.

Сіркесуы

Сіркесуы да микробтар мен бактериялардың көзін құрта алады. 1 литр суға жарты шай қасық сіркесуын құйсаңыз, гүліңіз ұзағырақ өмір сүреді.

Қант

Гүл салынған суға қант салуды көбіміз білеміз. Алайда оның да өз қағидалары бар екен. Қант құрамындағы глюкоза өсімдікке нәр береді. 1 литр суға 20-30 г қант қосылады. Алайда судың дәмі тәтті бола түскеннен кейін, онда бактериялар да көбейетінін естен шығармаған абзал. Сондықтан бұл суды кем дегенде күніне бір рет ауыстырып отыру қажет.

Лимон шырыны

Лимонның сығындысында да зарарсыздандыратын қасиет бар, ол судағы зиянды бактериялармен күреседі. Оның үстіне қышқыл судағы ызғарды азайтады. Лимонды сығып, 1 литр суға 2-3 тамшы тамызсаңыз болады.

Аспирин

Ацетилсалицил қышқылы құрамында интерферон заты бар, ол тамырынан кесілген өсімдіктің өмірін ұзартады. Қоректік заттармен қамтамасыз етіп, ылғалдандырады. 1 литр суға 1 таблетка аспирин саласыз.

Ал сіз гүлдің солмауы үшін қандай тәсілдерді қолданасыз?