Биыл Алматы ауданында мектеп, медициналық орталық, қолжетімді тұрғын үй салынады – Алтай Көлгінов (ВИДЕО)

Қала басшысының айтуынша, бұл ауданның құрылғанына 24 жыл болды. Тұрғындармен кездесу 2,5 сағатқа созылған. Ниет білдіргендердің бәрі сұрақтары мен ұсыныстарын айтты.

Кездесу барысында қала тұрғындары апатты жағдайдағы ескі үйлерді бұзу, тұрғын үй кешендерін жөндеу, электрлік қосалқы станциялардың жұмысы, әлеуметтік нысандар, кәріз желілері, аулалар мен қоғамдық кеңістіктер салу, қосымша автобустар шығару, көгалдандыру, тығыз салынған құрылыс, интернет, су қысымы секілді түрлі мәселелерді көтерді. Алматы ауданы құрылғаннан бері жергілікті тұрғындар саны 4 есе артты. Қазір мұнда 320 мыңға жуық адам тұрады.

Әлеуметтік нысандарды салудан бөлек, басты мәселелердің бірі – кәріз желісі мен шағын электр станцияларын салу. Мәселен былтыр 146 проблемалы учаскеде су басу мәселесі шешілді. Осы үшін 130 км-ден астам нөсер кәрізі мен арық-науа жүйесі салынды. Олардың бір бөлігі Алматы ауданында орналасқан. Мысалы су басу мәселесі ауданның (және қаланың) ең проблемалы тұстарының бірі – Б.Момышұлы даңғылында шешілді. Бұл маңайда жаңбырлы күндері көліктер белшесінен суға бататын. Сол себепті қолданыстағы нөсер кәрізі желісінің өткізу қабілетін 1,5 есе арттыратын нөсер кәрізінің магистральдық коллекторын салдық. Сол сияқты Жастар шағын ауданында (Тәшенов пен Амман көшелерінің қиылысы) жеткізуші коллекторлар мен өзге де кәріздерді қайта салу арқылы тазарту қондырғысы орнатылды. Олар көшелер мен үйлерді су басудан сақтап қалды, – деді Алтай Көлгінов өзінің instagram-парақшасында.

Сондай-ақ әкім жазғандай, Алматы ауданында газ тарату желісі салынды. Бұл ауданда 1700-ге жуық отбасы газға көшті. Көгілдір отын қала тұрғындарының өмірін экологиялық тұрғыдан жақсартады.