Елордада авиация күніне арналған футболдан қалалық ашық турнир өтті

Ерекше форматтағы турнирге 2011 және 2012 жылдары туған балалар қатысады.

Айтулы додаға қаладағы 10-ға жуық команда қатысты. Сондай-ақ жарысқа Көкшетау мен Павлодар қаласындағы  клубтар да қатысуға өтінім берген.

Мұндай жарыстар балалар үшін – спорттық мереке. Олар өзара тәжірибе алмасып, керемет әсер алады. Енді осындай турнирлер тек елордада не ірі қалаларда ғана емес, еліміздің түкпір-түкпірінде тұрақты ұйымдастырылуы керек. Өйткені мұндай турнирдің ұлт саулығын қалыптастыруда үлесі зор. Бұған қоса, балалар кәсіпқой тұрғыда шыңдалып, танымал футболшы болсам деген армандарына бір табан жақындай түседі, - дейді қалалық Футбол федерациясының президенті Давид Лория.

Ұйымдастырушылардың айтуынша, қалалық футбол федерациясымен бірлесе отырып, алдағы уақытта осындай үлгідегі жарыстарды тұрақты түрде өткізуді жоспарлап отыр. Әсіресе, оны Балалар жылы аясында қолға алу өте маңызды дейді. Өйткені дәл осы жас деңгейіндегі балалар арасындағы бәсекелер өте аз. Ал олардың шеберлігін кәсіпқой тұрғыда шыңдау үшін және болашақ чемпиондарды қазірден даярлау үшін турнирлер санын шұғыл еселеп арттыру қажет екенін алға тартады.

Жарыс қорытындысы бойынша көкшетаулық «Оқжетпес» командасы барлық қарсыласын айқын басымдықпен ұтып, жарыс жеңімпазы атанды.