Түркістан қаласының өз стилі болуы керек – әкім

Бұл туралы Орталық коммуникациялар қызметі алаңында Түркістан облысының әкімі Дархан Сатыбалды айтты, деп хабарлады Elorda.info. 

Былтыр Президентіміз қала тарихи, рухани орталық деген атауға лайық деп ұсыныс берді. Қазіргі таңда арнайы заң жобасын әзірлеп, ол орталыққа ұсынылды. Орталық мемлекеттік органдардың қарауында. Қазір көбінің келісімін алдық. Жақын арада Үкіметтің келісімімен ары қарай Парламентке өткізетін боламыз, – деді облыс әкімі.

Дархан Сатыбалды Түркістан ең көне қалалардың бірі және оның аумағында ЮНЕСКО-ның бүкіләлемдік мұралары тізіміне кіретін Қожа Ахмет Яссауи кесенесі бар екенін еске салды. 

Оны сақтап, келесі ұрпаққа жеткізуіміз керек. Сол себепті ерекше статустың берілуі біріншіден, түрлі мәселелер шыққан кезде, өзіміз шешім қабылдап, тиісті шаралар жүргізуге мүмкіншілік береді. Екіншіден, қаланың рухани, мәдени дамуына серпін береді деген сенімдеміз, – деді ол.

Сондай-ақ, ол кесененің айналасындағы құрылыстарды реттеу мәселесі туралы айтты. Облыс әкімінің сөзінше, Түркістан қаласын бір стильде дамыту көзделген. Осы ретте шаһарда құрылысқа байланысты кеңес құрылатынын жеткізді. Яғни, абаттандырудан бастап, нысандарды күтіп ұстауға дейінгі мәселелер назарда болады.

Қазір кесененің жанында жеке меншіктің жері болса, ол бізбен келіспей, жобасын жасайды да, құрылысын сала береді. Ал ол жерде біздің ЮНЕСКО-ның талаптары бар. Соның бәрін бір стильде, дизайнда құратын боламыз, –деп қорытындылады өз сөзін Дархан Сатыбалды.