Авиациялық әкімшілікке жолаушыларды тексеру стандарттарын қайта қарау тапсырылды

Көлік министрлігінде вице-министр Талғат Ластаевтың төрағалық етуімен республикалық және облыстық маңызы бар 20 әуежайдың және авиациялық қауіпсіздік қызметтерінің басшыларымен жолаушыларды тексеру және оларға қызмет көрсету кезінде қызмет көрсетусапасын арттыру мәселелері бойынша отырыс ұйымдастырылды.

Бүгінгі таңда азаматтық авиация саласының негізгі көрсеткіштері қарқынды өсіп келеді. Өткен жылы әуежайлар 26 млн астам жолаушыға қызмет көрсеткен. Оның ішінде, отандық әуекомпаниялары 13,3 млн жолаушыны тасымалдаған. Бұл өткен жылғы көрсеткіштен 21 пайызға жоғары.

Жалпы бүгінгі таңда әлемнің 27 елімен халықаралық әуе қатынасы орнатылған. Аптасына 484 рейс жиілігімен 86 бағыт бойынша 4 қазақстандық және 30 шетелдік әуекомпаниялары жолаушы тасымалдайды. 

«Діни және өзіндік ұлттық дәстүрімен ерекшеленетін Парсы шығанағы, Азия және Еуропа елдеріне ұшатын рейстер саны артып келеді. Осыған байланысты әуе жолаушыларына қызмет көрсету кезінде олардың ұлттық бірегейлігін ескере отырып, стандарттар мен талаптарды түбегейлі қайта қарау қажеттілігі атап өтілді. Себебі әуежайларда төмен қызмет көрсету сервисі елімізде туризмді дамыту және инвестиция тарту бойынша атқарылып жатқан жұмысқа кері әсер етуі мүмкін екенін ескеру қажет», - делінген хабарламада.

Кеңес қорытындысы бойынша әуежайларға жолаушыларға қызмет көрсету сапасын жақсарту үшін бірнеше бағыт бойынша жұмысты күшейту қажет екені айтылды.

Сондай-ақ Қазақстанның авиациялық әкімшілігіне жолаушыларға қызмет көрсету және ұшу алдындағы тексеру жүргізу кезінде әуежай қызметкерлерінің азаматтық мәдениет деңгейін одан әрі арттыруды ерекше бақылауға алу және тұрақты мониторинг жүргізу тапсырылды.