Қазақстандық спортшылар ауруханада тегін емделеді

ҚР ПІБ Медициналық орталығының ауруханасы мен «Қазақстандық спортшылар одағы» РҚБ ынтымақтастық туралы меморандумға қол қойды, деп хабарлады Elorda.info қала әкімдігінің ресми сайтыына сілтеме жасап. 

Енді аурухананың спорттық медицина орталығында отандық спортшылар консультациялық-диагностикалық және хирургиялық қызметтерді тегін ала алады. 

Меморандум біздің серіктестігімізді нығайта түседі. Міне, осы ынтымақтастықтың пайдасын көрсететін бірнеше негізгі тармақ бар: мамандандырылған медициналық қызметтер көрсету, жеке тәсіл, жарақаттанудың алдын алу, спорттық әлеуетті оңтайландыру, - деді ҚР ПІБ МО ауруханасының спорттық медицина орталығының басшысы Асқар Баймұхаметов.

Өз кезегінде «Қазақстандық спортшылар одағы» РҚБ төрағасы Азамат Қарлығашев бұрынғы және қазіргі спортшыларға көмек көрсеткені үшін ҚР ПІБ МО ауруханасының басшылығына алғыс білдірді.

Спортшыларымыз мен спорт ардагерлері енді сапалы медициналық көмек ала алатынына қуаныштымын. Елімізде спортшылар сапалы және өте қажет медициналық көмекке жүгіне алмай жатады.
Денсаулық біздің басты капиталымыз, онсыз спортшы карьерасын ары қарай жалғастыра алмайды. Ал мұндай жағдайлар бізде өте көп кездеседі, - деді А.Қарлығашев.

Бұл мәселенің өзектілігін «Қазақстан спортшылар одағы» РҚБ Төралқа төрағасы, Олимпиада чемпионы Серік Сәпиев те растады.

Карьерасының шыңында спортты тастап кеткен біраз спортшыны білемін.
Спортшылар үшін мұндай мүмкіндік жасалғанына қуаныштымын. Енді спортшыларымыз кәсіби жарақаттардың салдары үшін қорықпай, сапалы медициналық көмек ала отырып, спортпен шұғылдануды жалғастыра алады деп үміттенемін, - деп атап өтті ол.

ҚР ПІБ Медициналық орталығы ауруханасының директоры Рустам Албаевтың айтуынша, қазіргі және бұрынғы спортшыларды емдеу, оңалту және қалпына келтіру үшін барлық жағдай жасалған.

Спорттық медицина тек операциялар ғана емес, ең алдымен, алдын алу шаралары. Аурухана базасында 2023 жылдың ақпанында Спорттық медицина орталығы ашылды.
Орталық дәрігерлері жыл сайын шетелде біліктілігін арттырады. Жақында дәрігерлер Испанияда, Кирон Салюд ауруханасында үлкен лига футболшыларына операция жасайтын әйгілі профессор Рамон Кугаттың қол астында оқыды. Сондай-ақ спорттық медицина орталығында спортшылар кеңес алып, операция жасатып қана қоймай, Қазақстанның кез келген азаматы ТМККК және МӘМС шеңберінде осы қызметтерді ала алатынын атап өткім келеді, - деді Р.Албаев.

Спорттық медицина орталығының құрылуы спортпен шұғылданатын кәсіби спортшылар мен қазақстандықтардың жарақат алуының жоғары деңгейіне байланысты болды.