Грек-рим күресінен әлем чемпионатында бүгін төрт қазақстандық балуан өнер көрсетеді

Ел құрамасынан бүгін Ғалым Қабдунасаров (63 келі), Дін-Мұхамед Қошқар (67 келі), Диас Қален (82 келі), Ислам Умаев (97 келі) бозкілемге шығады.

Ғалым Қабдунасаров 1/8 финалға жолдаманы болгариялық Николай Иванов Вичевпен сарапқа салса, Дін-Мұхамед Қошқар франциялық Мамадас Силламен сынға түседі.

Ал Диас Қаленнің қарсыласы өзбекстандық Жалгасбай Бердімұратов болса, Ислам Умаев өзбекстандық Рустам Ассакаловпен белдеседі.

Сондай-ақ, бүгін қазақстандық Аманғали Бекболатов (55 келі) қола медаль үшін жұбаныш белдесуін өткізеді. Ол кеше, 10 қыркүйекте жартылай финалда грузиялық Нугзари Цурцумииге жол беріп қойды.

Ал Ибрагим Магомадов (72 келі) 1/8 финалда әзербайжандық Улве Ганизадеге жеңіліп қалған еді. Аталған қарсыласы финалға шығуына байланысты енді қазақстандық балуан жұбаныш белдесуінде болгариялық Девид Димитровпен кездеседі.

Қазақстандық тағы бір спортшы Тамерлан Шадукаев (77 келі) жұбаныш белдесуінде жеңіске жетсе, сербиялық Виктора Немеспен қола жүлдені сарапқа салады.

Ел құрамасынан Нұрсұлтан Тұрсынов (87 келі) жарыс жолын ерте аяқтады.

Айта кетсек, күрес түрлерінен әлем чемпионаты 10-18 қыркүйек аралығында өткізіледі .