Астанада генерал Сағадат Нұрмағамбетовті еске алу шаралары өтті

Астанадағы әскери колледжде еліміздің бірінші Қорғаныс министрі, Кеңес Одағының батыры, Халық қаһарманы, армия генералы Сағадат Нұрмағамбетовтің ескерткішіне гүл шоқтарын қою рәсімі өтті, деп хабарлады Elorda.info.

Аталмыш шараға генералдар, офицерлер, сержанттар, кадеттер, ұландар, сондай-ақ ардагерлер мен басқа да қонақтар қатысты. 1945 жылы даңқы жер жарып, аты аңызға айналған генерал бюстінің жанына оның есімі берілген әскери колледждің бүкіл жеке құрамы сап түзеді. Батырды құрметтеуге келгендер ескерткішке гүл шоқтарын қойды.

Бір минут үнсіздік жарияланды. Осыдан кейін Қорғаныс министрінің орынбасары, генерал-лейтенант Сұлтан Камалетдинов сөз сөйледі. Ол Қазақстанның бірінші Қорғаныс министрінің жауынгерлік жолы аңызға толы екенін, қазақ халқының батыр ұлы мемлекетке және болашақ ұрпаққа қызмет етудің, ерлік пен жауынгер абыройының, ар-намыс пен адамгершіліктің үлгісі болғанын атап өтті.

Сағадат Нұрмағамбетов Қарулы күштерді құруға, оны қалыптастыруға және дамытуға баға жетпес үлес қосты, әскерді жаңа жетістіктерге жеткізді, – деді Қорғаныс министрінің орынбасары. – Сағадат Нұрмағамбетовтің өмір жолы, ерлігі мен табандылығы қазақстандық Отан қорғаушылар үшін ғибрат аларлық дүние. Батырдың есімі халық жадында мәңгі сақталады. Армия генералы Сағадат Нұрмағамбетов салған даңқты жауынгерлік дәстүр жалғасады деп сенемін.