Равиль Валеев: 1 мамыр – халықтар достығын еске түсіретін күн

Астанадағы «Таң» татар-башқұрт мәдени орталығының басшысы Равиль Валеев жуырда атап өтілетін Қазақстан халықтарының бірлігі күні туралы пікір білдіріп, барша ұлт өкілдерін құттықтады, деп хабарлады Elorda.info.

1 мамыр – Қазақстан халқының бірлігі күні. Бұл күн барлық ұлт өкілдерінің достығы мен келісімінің мерекесі. Еліміздің барлық жетістіктері бейбітшілік пен келісімнің арқасында қол жеткізілді. Бірлік пен ынтымақтастықтың, бейбітшілік пен тұрақтылықтың бейнесіне айналу – Қазақстанның әрбір азаматының басты міндеті. Елімізде 130-дан астам этнос бейбітшілік пен келісімде тұрады. Халықтың бірлігі – толеранттылық пен мәдениетаралық диалогқа негізделген күшті және гүлденген мемлекеттің көрсеткіші. Жыл сайын 1 мамырда республика бойынша мерекелік концерт, спорттық жарыстар өтеді. Бүгінде осы күн барлық қазақстандықтарды біріктіретін жақсы дәстүрге айналды. Өйткені, оның міндеті – халық достығының, бейбітшілік пен ынтымақтастықтың, жүздеген мәдениеттердің бірігуінің маңызды құндылықтарын тағы бір рет еске түсіреміз. Этносаралық толеранттылық пен қоғамдық келісімді сақтау басты жетістіктердің бірі болды. Ұлттық бірлікті нығайту еліміздің және халқымыздың табысты болашағының кепілі болып қала береді, - дейді Равиль Валеев. 

Сондай-ақ, мәдени орталық басшысы «Таң» татар-башқұрт мәдени орталығының жұмысына тоқталып өтті. 

Бүгінгі таңда бірлестік Қазақстан астанасында тұратын он мыңдаған татарлар мен башқұрттардың салт-дәстүрі мен құндылықтарын біріктіреді. Негізгі дәстүр – аға буынға деген үлкен құрмет. Ақсақалдар кеңесі басқару мәселелерін талқылауға қатысады, қоғам өмірінің түрлі салаларындағы бірқатар ірі жобалардың бастамашысы болып табылады. Орталықта халықтар тарихын, ұрпақтар сабақтастығын сақтау үшін жексенбілік мектеп бар. Сәндік-көркем шығармашылық және қолданбалы өнер бойынша сабақтар өткізіледі. Ай сайын қайырымдылық акцияларын өткіземіз. Осы мереке күні барша қазақстандықтар мен ұлт өкілдеріне зор денсаулық, мол табыс және бақыт тілеймін, - деді ол.