Астаналықтар амфитеатрда Жеңіс күніне арналған концертті тамашалады (ФОТО)

Астанада Есіл өзенінің жағалауында орналасқан Амфитеатрда Жеңіс күніне арналған «Отанға қызмет – ұлы құрмет» атты концерт өтті, деп хабарлады Elorda.info.

Концертте «Сарыарқа» халық музыка ансамблі, «НАЗ» мемлекеттік би театры, Е.Рахмадиев атындағы Мемлекеттік академиялық филармониясының үрмелі аспаптар оркестрі, «Терра» би театры мен өзге де республикалық және халықаралық вокал конкурстарының жеңімпаздары өнер көрсетті.

Астана қалалық Мәдениет басқармасы және оған қарасты басқа да кәсіпорындармен 9 мамыр – Жеңіс күні мерекесіне арналған концерт өткіздік. Бірінші кезекте ол, әрине соғыс мен тыл ардагерлеріне арналды. Концертке Астана қаласының тұрғындары мен барша қонақтары келді. Мұнда өзіміздің отандық композиторлардың әндері мен соғыс жылдарындағы туындылар шырқалды. Сонымен қатар, М. Горький атындағы орыс драма театрының ұжымы көрермендер назарына театрлық қойылым ұсынды, - деді Мәдениет басқармасы басшысының орынбасары Нұран Камзин.

Мерекелік концертті тамашалауға келген тұрғындар мен қала қонақтарының қатары қалың болды.

Бұл жеңіс оңай келген жоқ. Оны өсіп келе жатқан балаларымыз білуі керек. Ұмытуға болмайды! Сондықтан бүгін осындай концертке немерелерімді әкеліп отырмын. Жеңіс мерекесі құтты болсын! - деді концертті тамашалауға келген елордалық тұрғын Гүлзада Есенова.