Елордада бокстан «Алаштың арландары» атты республикалық ашық турнир өтіп жатыр

15-18 желтоқсан аралығында Астана қаласындағы №83 мектеп-гимназиясында «Көкжал» спорт клубтары бірлестігінің ұйымдастыруымен «Алаш арыстарын» еске алу мен Қазақстан Республикасы Тәуелсіздік күніне орай бокстан жастар мен жасөспірімдер арасындағы «Алаштың арландары» атты республикалық ашық турнир өтіп жатыр, деп хабарлады Elorda.info.

Турнирдің мақсаты – жас спортшылар мен спорт сүйер қауым арасында еліміздің тәуелсіздік тарихын, «Алаш арыстарының» отанымыздың алдындағы еңбектерін насихаттау, бүгінгі жетістіктерімізді баянды ету жолында жастарымыздың бойына патриоттық, елдік қасиеттерді сіңіру, жастарды отансүйгіштік пен салауатты өмір сүру салтына шақыру. Турнирге 2007-2012 жылдары туған жасөспірімдер қатысып жатыр.

Жарысқа еліміздің барлық облыстарымен қатар Ресей, Өзбекстан, Тәжікстан, Қырғызстан Республикаларының спорт клубтары қатысуда.