Елордалық сарбаздар жол апатына түскендерге көмектесті

Ұлттық ұланның баспасөз қызметінің мәліметінше, оқиға Сарыарқа ауданында қоғамдық тәртіпті сақтау бойынша қызмет атқару кезінде болған. Әскери жасақ сақшылары, атап айтөанда, әскери жасақ бастығы қатардағы жауынгер Талғат Қали, сақшылар қатардағы жауынгерлер Нұршат Мәсімжан мен Ербол Қошанов Бейбітшілік және Жангелдин көшелерінің қиылысында болған жол-көлік оқиғасының куәсі болған.

Тәртіп сақшылары оқиғаны дереу төтенше жағдайлар қызметіне хабарлап, апаттан зардап шеккендерге  тез арада көмек көрсетуге бет бұрған.

Сарбаздар зардап шеккен «Лада Гранта» көлігінің жүргізушісіне жедел жәрдем келгенге дейін қажетті алғашқы медициналық көмек көрсеткен .

Өз кезегінде елорда тұрғыны Нұрқанат Сапарбеков апат кезінде зардап шеккендердің қасында болған Ұлттық ұлан  сарбаздарына алғашқы көрсеткен көмектері үшін алғыс білдірді.

Біз тек қоғамдық тәртіп пен қауіпсіздікті ғана қамтамасыз етпейміз. Өрт шыққан жағдайда немесе басқа да оқыс оқиғалар кезінде халыққа көмек қолын созуға тырысамыз. Осы жолы жол-көлік апаты орын алды. Апатқа түскен азаматтарға көмектестік, - дейді қатардағы жауынгер Талғат Қали.