Елордада жастармен жемқорлыққа қарсы кездесу өтті

Спикерлер ретінде Қ.Қуанышбаев атындағы Мемлекеттік академиялық қазақ музыкалық драма театрының директоры, "Құрмет" орденінің кавалері Ернар Жұматаев және "Jas Otan" ЖҚ қалалық филиалы төрағасының бірінші орынбасары Мағзұм Арсланбек сөз сөйледі.

Кездесу барысында Ернар Жұматаев театр және актерлік шеберлік туралы айтып, өз тәжірибесімен және өмірлік ұстанымдарымен бөлісті. "Құрмет" орденінің иегері өз мамандығы, еңбек қызметіндегі жетістіктері туралы айта отырып, қатысушыларды тұлғалық өзін-өзі дамытуға, патриотизмге, парасаттылық пен сатылмаушылыққа шақырды.

Мағзұм Арсланбек студенттерді парасаттылық пен адалдық қағидаттарын ұстануға және жас ұрпақты кез келген құқық бұзушылыққа мүлдем төзбеушілікті қалыптастыру, парасаттылық қағидаттарын насихаттау жөніндегі жұмысқа белсенді тарту бойынша жұмыс жүргізуге шақырды.

Әңгіме барысында жастарды дамыту, олардың қоғамға қосқан үлесі туралы мәселелер қозғалды. Сондай-ақ, студент жастарды белсенділер қатарына қосылуға шақыра отырып, оның идеяларын жүзеге асыруда қолдау туралы айтылды.

Еуразия гуманитарлық институтының проректоры Ярослава Оспанова спикерлерге студент жастармен сындарлы диалог жүргізгені үшін алғысын білдіріп, институттың парасаттылық және академиялық адалдық қағидаттарына бейілділігін атап өтті.

Қатысушылар пайдалы ақпарат, пікірлер мен идеялар алмасатын TEDx форматы студенттердің одан әрі өзін-өзі жетілдіруге, қоғамдық өміріне белсенді қатысуға және адамгершілік құндылықтарды сақтауға деген ынтасы мен дайындығын көрсетті.