Көпбалалы аналар мен ерекше балалардың аналарына қандай көмек беріледі?

Жобаның мақсаты – өмірлік қиын жағдайда жүрген балалары бар отбасыларға көмек көрсету саласында бірыңғай білім беру, ақпараттық-әдістемелік, ақпараттық-коммуникациялық, консультативтік кеңістік құру.

Жоба «Азаматтық бастамаларды қолдау орталығы» коммерциялық емес акционерлік қоғамы ұсынған гранттық қаражат есебінен жүзеге асырылады.

Брифингте спикер ретінде Ләззат Алшынова, «Замандас 21» ҚҚ басшысы Варвара Полякова, жоба үйлестірушісі Наталья Семененко, психологиялық қызметтің жетекшісі сөз сөйледі.

Жоба шеңберінде «бір терезе» қағидаты бойынша құқықтық, психологиялық, әлеуметтік-педагогикалық, білім беру және басқа да мәселелер бойынша ақпараттық-консультациялық қолдау ұйымдастырылды. Консультациялар жексенбіден басқа күндері бірыңғай телефон нөмірі бойынша жүргізілді. Құжаттар мен жазбаша сұрақтарды қабылдау үшін электрондық пошта жұмыс істейді.

Жобаның тағы бір бағыты – мамандықтарға оқыту курстарын ұйымдастыру. 400-ден астам әйел жоба аясында ұйымдастырылған курстарда оқыды. Қызметтер нарығын талдау бүгінгі таңда сұлулық, тұрмыстық қызметтер және ақпараттық технологиялар саласындағы мамандар сұранысқа ие екенін көрсетті. Осыған байланысты келесі мамандықтар бойынша курстар ұйымдастырылды: шугаринг шебері, кірпіктерді ламинаттау шебері, қасты ламинаттау шебері, клининг процесін ұйымдастыру шебері, тәтті букет жасау шебері, тігін шеберлігі курсы, аспаздық өнер шебері, СММ маманы.

Курс тыңдаушыларының 99%-ы әйелдер. Курс аяқталғаннан кейін қатысушылар сертификаттар алды, оларға жұмысқа орналасуға көмектесті. Курс түлектерінің кәсіби өсуіне үнемі мониторинг жүргізіліп, консультациялық қолдау көрсетілуде.

Жобаға ақпараттық қолдау әлеуметтік желілер мен мессенджерлер арқылы көрсетіледі. ҚӨЖ-да қалған отбасыларға мемлекеттік көмек түрлері туралы 11 ақпараттық буклет әзірленді.

Тренерлер мен консультанттар ретінде 10-нан астам белсенді көпбалалы ана мен даму ерекшеліктері бар балаларды тәрбиелеп отырған аналар тартылды.

Жоба соңында барлық пікірлер көрсетілген қызметтердің сапасын бағалау үшін жиналады.

Қазақстан бойынша отбасыларды қолдау орталықтарының 300-ден астам қызметкері «Өмірде қиын жағдайға тап болған отбасымен жұмыс істеу ерекшеліктері» тақырыбында біліктілікті арттыру курстарынан өтті.