Биологиядан халықаралық олимпиада жүлдегерлері елге оралды

Қазақстандық оқушылар Ереванда өткен жарыстан 3 күміс, 1 қола медальмен оралды. Осылайша, жас биологтар былтырғы көрсеткішті жаңартты. Оқушыларымыз бір жыл бұрын 1 күміс, 2 қола еншілеген болатын.

Айта кетейік, биологиядан халықаралық олимпиада 10-18 шілде аралығында Армения астанасында өтті. Оған әлемнің 64 елінен 250 оқушы қатысты. Қазақстанның намысын Нұр-Сұлтан, Алматы және Өскемен қалаларынан 4 оқушы қорғады. Бұл оқушының барлығы да республикалық олимпиадалардың жеңімпаздары мен жүлдегерлері.

Бүгінгі күні оқушыларымыз математика, физика, химия, география және биология пәндерінен ең беделді олимпиадаларда 3 алтын, 13 күміс және 5 қола медаль жеңіп алды. Сіздер Арменияда өткен биология олимпиадасында Қазақстанның намысын абыроймен қорғап, ұлттық құрамаға 3 күміс, 1 қола медаль алып келдіңіздер. Бүгінгі таңда еліміздің ең үлкен байлығы – адам капиталы және басты мақсат - интеллектуалды халықты қалыптастыру. Биылдан бастап Президенттің тапсырмасы бойынша халықаралық олимпиадалардың жеңімпаздары мен жүлдегерлеріне ақшалай сыйлықтар мен отандық ЖОО-ларда ҰБТ тапсырмай-ақ оқуға гранттар беріліп жатқанын жақсы білесіздер. Бұл – мемлекеттің дарынды балаларды қолдау үшін жасап жатқан жұмысының бірі. Кез келген жетістіктің артында орасан зор еңбек жатқанын білеміз. Сіздер ата-аналарыңыздың, ұстаздарыңыздың және мектептеріңіздің үмітін ақтадыңыздар деп сенімді түрде айта аламын. Құрамамыз дайындықтың жоғары деңгейін көрсетіп, отандық білім беру жүйесінің әлемдік аренадағы көшбасшылық ұстанымын дәлелдегеніне шын жүректен қуаныштымын, - деді Оқу-ағарту вице-министрі Айбат Ілиясов.

Алтын медаль алған оқушыға 1 500 АЕК (4,5 млн теңге), күміс медаль үшін – 1 000 АЕК (3,1 млн теңге), қола медаль үшін – 500 АЕК (1,5 млн теңге) көлемінде ақшалай сыйлық берілетінін еске сала кетейік. Оқушыларды жарысқа дайындаған ұстаздар да төлемақы алады.