Президент Жолдауы жастарды қолдады – қоғам белсендісі

Қоғам белсендісі Сағат Сәрсенбай Президент Қасым-Жомарт Тоқаевтың «Әділетті мемлекет. Біртұтас ұлт. Берекелі қоғам» атты Жолдауының басты тетігі әлеуметтік-экономикалық бағытқа арналып, жастар саясатын жетілдіруге, жасөспірімдерді нақты материалдық қолдаудың шарттары айқындалғанын айтты, деп хабарлады Elorda.info. 

Стратегиялық құжатта жастарға жағдай жасау, олардың сапалы білім алып, тұрақты жұмыспен қамтылуы, төмен пайызбен несие алуы сияқты міндет-ұсыныстар алдағы уақытта жүзеге асатын болса, қоғамның жастар бөлігі бірқатар жеңілдікке ие болар еді.

Мен қатарлы жастардың басым көпшілігі мемлекеттік немесе бюджеттік мекемелерде жұмыс істеп, таңертеңнен кешке дейін жүруді қалай бермейді. Жеке бизнесін құрып, өз уақытын тиімді пайдаланғанды құп көреді. Бірақ олардың жұмысы өрге басуына кедергі келтіретін жайттар бар. Олар: несие алудың қиындығы, кепілдікке қоятын баспанасы болмауы және т.б. айтуға болады.

Мемлекет басшысы Жолдауда жатақхана мәселесін орынды көтерді.

Ресей билігі мобилизация жариялағаннан кейін мыңдаған ресейліктер елімізге ағылды. Олардың келуімен жалдамалы пәтердің бағасы қымбаттап, студент жастар далада қалды. Шыны керек, олардың көбісі мешіт жағалап, вокзалда түнеді. Бұдан тиісті министрлік хабардар деп ойлаймын. Егер студенттер үйі болса, жастар сапалы білім алуға мән беретін еді ғой! Қазір пәтерді жалдап тұратын жастар түнгі уақытта жалдамалы жұмыс орындарында істейді. Бұл қатардағы студенттер сапалы білімді қалай алады?

Осы орайда Президент жеке меншік жоғары оқу орындарындағы жатақхана мәселесіне мемлекет тарапынан қолдау жасалатындығын да орынды көтерді.

Бүгінде жастардың алдында үлкен міндеттер тұр. Олар өз білімін әрі қарай ел келешегінің дамуына арнап, экономиканың қай саласында болмасын еңбек етуді қалайды.

Жолдауда бізді қуантқаны, 18 жасқа толғанға дейін арнайы шот ашып, оның алдағы уақытта сапалы білім алуына мүмкіндік жасауы туралы ұсыныс. Бұл – көптеген қолдауға мұқтаж отбасылар үшін үлкен жеңілдік.