Ұлттық музейге биыл жарты миллионнан астам адам барған

Жыл басынан бері ҚР Ұлттық музейіне 516 397 адам барған, деп хабарлады Elorda.info.

Ұлттық музейде 34 ірі көрме ұйымдастырылды. Оның 4-еуі халықаралық деңгейдегі жоба. «Музейлер түні» акциясы аясында Ұлттық музейді бір түнде 47 мыңнан астам адам тамашалады, бұл – қазақ музейлерінің тарихындағы рекордтық көрсеткіш.

Онда оқушылар аудиториясын тарту бойынша ауқымды жұмыстар жүргізілуде. «Музейдегі оқу күні» мәдени-ағартушылық жобасы аясында елордалық мектеп оқушылары Қазақстан тарихы бойынша музей сабақтарына қатысуда. Мереке кезінде оқушылар экскурсияларға, әртүрлі сабақтарға, шеберлік сабақтарына, квесттерге, конкурстарға және жарыстарға тегін қатысады. Сондай-ақ, студенттік аудиторияның үлесі келушілердің жалпы санының шамамен 30 пайызын құрады.

Естеріңізге сала кетейік, 2014 жылдан бері Ұлттық музей тарихында келушілердің екі негізгі көрсеткіші тіркелген. 2017 жылы ЭКСПО халықаралық көрмесі аясында Ұлттық музейді 280 мың адам тамашаласа, өткен жылы бұл көрсеткіш 330 мың адамға жеткен. Биылғы 10 айда келушілер саны 516 397 адамды құрады, бұл еліміздің ұлттық мәдени мұрасы мен тарихына қызығушылықтың артқанын көрсетеді.