Іздеу 
KZ
Словенияда «Астана Опера» әртістерінің өнерін 3 мың көрермен тамашалады
Сабина Кәкімжан 
216 
«Астана Опера» балет труппасы Люблянадағы 72-ші Халықаралық жазғы фестивальде «Спартак» қойылымын сахналап, көрерменнің ыстық ықыласына бөленді, деп хабарлады Elorda.info.
Мәдениет және ақпарат министрлігінің баспасөз қызметі таратқан мәліметке сүйенсек, «Цанкарьев дом» мәдени орталығының сахнасында Қазақстанның еңбек сіңірген қайраткерлері Бақтияр Адамжан, Мәдина Өнербаева, Әйгерім Бекетаева өнер көрсетті. Арман Оразов Красстың рөлін, ал Серік Нақыспеков Гладиаторды сомдады.
Қойылымды Қазақстанның еңбек сіңірген қайраткері, «Астана Опера» театрының дирижері Абзал Мұхитдиннің жетекшілігімен Словен филармониялық оркестрі мен әйелдер хоры сүйемелдеді.
Люблянадағы халықаралық жазғы фестивальге жыл сайын әлемнің түкпір-түкпірінен көрнекті әртістер мен ұжымдар қатысады. Аталмыш фестиваль – Еуропадағы ең беделді мәдени іс-шара. Бүгін осы фестивальде театрдың XI театр маусымын аяқтайтын «Астана Опера» балет труппасының екінші және қорытынды қойылымы өтеді.
Айта кетейік, бұл – қазақстандық ұжымның алғашқы еуропалық туры емес. Осыған дейін «Астана Опера» әртістері Италия, Испания және басқа елдер сахнасында сәтті өнер көрсеткен болатын. Балет труппасының көркемдік жетекшісі, Қазақстанның еңбек сіңірген әртісі Алтынай Асылмұратова ұсынылған бағдарламалар жоғары деңгейде дайындалғанын атап өтті.
