Еліміздегі алғашқы атом электр станциясы салынатын аумақ белгілі болды

Энергетика министрлігі елімізде АЭС салу мәселесі бойынша жария талқылаулар өткізу туралы ақпарат жариялады, деп хабарлады Elorda.info

Мемлекет басшысының Қазақстанда атом энергетикасын дамыту мүмкіндігін зерделеу жөніндегі тапсырмасын орындау мақсатында реакторлық технологияларды таңдау бойынша бұрын жүргізілген зерттеулерді өзектендіру, атом электр станциясының қуаты мен құрылыс ауданын анықтау бойынша жұмыстар жүргізілді.

Жүргізілген зерттеулердің қорытындысы бойынша атом электр станциясы құрылысының ең қолайлы ауданы ретінде Алматы облысы Жамбыл ауданы Үлкен ауылының аумағы таңдалды,-делінген ведомство таратқан мәліметте.

Сонымен қатар хабарламада елдегі аталған станцияның құрылысын кімдер жүргізуі мүмкін екендігі туралы да ақпарат берілген. 

Елдегі алғашқы атом электр станциясы үшін ұқсас станцияны салу және сәтті пайдалану тәжірибесінде тексерілген технологияны таңдау ұсынылады. Осыған байланысты ядролық технологиялардың мынадай әлеуетті жеткізушілерінен тұратын «шорт-тізім» жасалды:

HPR-1000 қытайлық CNNC компаниясы;

APR-1400 реакторы бар корей KHNP компаниясы;

ВВЭР-1200 және ВВЭР-1000 реакторлары бар Ресей Росатом компаниясы;

EPR-1200 реакторы бар француз EDF компаниясы.

Зерттеу нәтижелері 2022 жылғы мамырда атом саласын дамыту жөніндегі ведомствоаралық комиссияның отырысында қаралды және мақұлданды,-деп жазды министрлік.

«Атом энергиясын пайдалану туралы» Қазақстан Республикасы Заңының 12-бабына сәйкес ядролық қондырғыларды салу және салу ауданы туралы шешімді аумағында қондырғы салу жоспарланып отырған жергілікті өкілді органдардың келісімімен Қазақстан Республикасының Үкіметі қабылдайды. Бұл ретте мәслихат жергілікті өкілді орган болып табылады.

Осыған байланысты, 2022 жылғы қарашада Алматы облысы мәслихатының кезекті сессиясында аудан тұрғындарын қолдау шартымен құрылысқа келісім беру туралы шешім қабылданды. Бұл ретте Экологиялық кодекске сәйкес өткізілетін қоғамдық тыңдаулар жобалық құжаттама әзірленгеннен кейін жобаны экологиялық бағалау кезеңдерінде кейінірек бастамашылық етілетін болады.