Қазақстан-Ресей Үкімет басшылары өзара келіссөз жүргізді

Үкімет басшылары сауда-экономика, қаржы-инвестиция, транзиттік-көлік, ауыл шаруашылығы, мұнай-газ химиясы, энергетика, ғарыш салаларындағы Қазақстан-Ресей ынтымақтастығын одан әрі арттыру перспективаларын, сондай-ақ өнеркәсіптік кооперация аясындағы жобаларды талқылады. Еуразиялық экономикалық одақ форматындағы өзара іс-қимылдың өзекті мәселелері, сондай-ақ COVID-19 індетінің таралуына қарсы күрес және екі елдің экономикалары үшін пандемия салдарын жою жөніндегі бірлескен шаралар қаралды.

Асқар Мамин екі елдің ұлттық экономикаларының белсенді қалпына келуі аясында Қазақстан мен Ресей арасындағы сауда-экономикалық қатынастар мен инвестициялық ынтымақтастық дамуының жоғары қарқынын атап өтті. Оның айтуынша, осы жылдың 8 айында елдер арасындағы тауар айналымы 14,7 миллиард долларға дейін, 27 пайызға өскен. 2021 жылдың қорытындысы бойынша тараптар бұл көрсеткішті 20 миллиард долларға дейін жеткізуге ниетті.

2021 жылдың бірінші жартысында РФ-тың ҚР экономикасына тікелей инвестицияларының көлемі 17 пайызға артып, 704,9 миллион долларды құраған. Қазақстанда Ресей капиталының қатысуымен 10 мыңнан астам кәсіпорын жұмыс істейді, бұл шетелдік қатысуы бар кәсіпорындардың жалпы санының 36,1 пайызын құрайды. Өнеркәсіптік кооперация саласында 1,7 миллиард доллар сомасына 8 бірлескен ірі жоба іске асырылып жатыр.

РФ Үкіметінің Үйлестіру орталығында Асқар Мамин мен Михаил Мишустин көлік инфрақұрылымының озық дамуы, екі елдің транзиттік әлеуетін және аймақтық көліктік өзара байланысын нығайту, оның ішінде «Батыс Еуропа – Батыс Қытай», «Солтүстік – Оңтүстік» дәліздері және ЕАЭО кеңістігіндегі басқа да бағыттар шеңберінде нығайту мәселелерін талқылады. Сондай-ақ ҚР Индустрия және инфрақұрылымдық даму вице-министрі Берік Қамалиевтің, РФ Көлік министрі Виталий Савельевтің, «Қазақстан Темір Жолы» ҰК» АҚ басқарма төрағасы Нұрлан Сауранбаевтың және «РТЖ» ААҚ бас директоры – басқарма төрағасы Олег Белозеровтың баяндамалары тыңдалды.

Биылғы жылдың 9 айында Қазақстан мен Ресей арқылы Орталық Азия, Еуропа, Қиыр Шығыс бағыттарына 599,5 мың ЖФЭ тасымалданды, бұл 2020 жылдың сәйкес кезеңіндегі көрсеткіштен 37 пайызға артық. Қытай – Еуропа – Қытай бағытындағы транзиттік контейнерлік тасымалдар көлемі 493,5 мың ЖФЭ (+38 пайыз) құрады.

Айта кетсек, келіссөзге ҚР-ның РФ-дағы елшісі Ермек Көшербаев, Стратегиялық жоспарлау және реформалар агенттігінің төрағасы Қайрат Келімбетов, Сауда және интеграция министрі Бақыт Сұлтанов, Энергетика министрі Мағзұм Мырзағалиев, «Самұрық-Қазына» АҚ басқарма төрағасы Алмасадам Сәтқалиев және т.б. қатысты.