Елордада бос жұмыс орындары жәрмеңкесі өтеді

Бұл туралы бүгін Астана қаласы Коммуникациялар қызметі алаңында «Түлектерді жұмысқа орналастыру» тақырыбы бойынша өткен брифингте қалалық «Еңбек мобильділігі орталығы» ҚММ директоры Олжас Омар айтты, деп хабарлады Elorda.info.

Құрметті астаналықтар, сіздерге жұмыс іздегендер мен жұмыссыздар үшін тіркелу алгоритмін еске салғым келеді: enbek.kz электронды еңбек биржасы, egov.kz электронды порталын пайдалану арқылы онлайн және сондай-ақ қаладағы Бейбітшілік көшесі,  9 мекенжайында орналасқан Мансап орталығында тіркеле аласыздар, - деді Олжас Қобыландыұлы.

Жұмысынан айырылған жағдайда әлеуметтік төлем алу құқығына міндетті әлеуметтік сақтандыру жүйесіне кемінде 24 ай қатысушы болған азамат жұмыссыз ретінде тіркелген күннен бастап ие болады.

Орталық өз құзіретінде жұмыссыздарға жұмысқа орналасуға тек жәрдемдесу қызметін атқарады. Орталық қызметкерлері сізді тіркеп, жалпы мәліметтер базасына енгізеді. Әр орталықтың маманына 400-800-ге дейін жұмыссыздар тіркеледі. Күн сайын enbek.kz сайтында 4-5 мыңнан астам бос жұмыс орындары бар және әлеуметтік желілерде (instagram, facebook, telegram) күнделікті бос орындар, соның ішінде мүгедектігі бар адамдарға бос орындар жарияланады.

21 маусым күні  Астанада сағат 14.30-17.00 аралығында Бейбітшілік көшесі, 9 мекенжайы бойынша шағын бос орындар жәрмеңкесі өтетінін хабарлаймын. Онда келесі жұмыс берушілер қатысады: Solax Hotel Business Management компаниясы. ЖШС (Пекин Палас) , «SMEU Astana» ЖШС, «SMEU Svetofor» ЖШС, «Bazis Construction» ЖШС Астана қаласындағы филиалы және т.б. – деп сөзін түйіндеді басшы.