Астанада Еуропа күніне арналған фестиваль өтеді

Ертең елордадағы Ғашықтар саябағында Еуропа күніне арналған фестиваль өтеді, деп хабарлады Elorda.info.

Фестиваль аясында Еуропа мәдениеті таныстырылып, Еуропалық Одаққа мүше мемлекеттердің ұлттық тағамдары мен бірегей қолөнері көрсетілетін жәрмеңке ұйымдастырылады.

Сондай-ақ, ЕО жобалары, Еуропалық Одақ қаржыландыратын түрлі жобаларды көрсететін стендтер қойылып, олардың Қазақстан мен Орталық Азияға тигізген оң әсері туралы мәлімет беріледі. Испан фламенкосы, француз әндері, би шеберлік сабақтары мен флешмобтар өткізу де жоспарланған.

«EuroFest2024 – еуропалық халықтар арасындағы бірлік, әртүрлілік және достықты атап өтуге мүмкіндік беретін шара. Фестиваль елорда тұрғындары мен қонақтары үшін көңілді, танысу және мәдени алмасу күні болмақшы», - деп көрсетті ұйымдастырушылар.