Әміржан Әлпейісов: Президент көтерген үлкен мәселелердің бірі – мемлекеттік тіл

Бүгін Астанада Президент Қасым-Жомарт Тоқаевтың Қазақстан халқы Ассамблеясының «Бірлік. Жасампаздық. Өрлеу» атты ХХХІІІ сессиясы өтті, деп хабарлады Elorda.info.

Осыған қатысты  ҚХА-ның Астанадағы Ақсақалдар кеңесінің мүшесі, ЕҰУ профессоры Әміржан Әлпейісов пікір білдірді.

Мемлекет басшысының бүгінгі баяндамасы еліміздің саяси-экономикалық және әлеуметтік мәселелерін қамтыды.Мұнда барлық мәселе жан-жақты қарастырылған. Баршаңызға белгілі, қазір күллі әлемде әр түрлі сипатта табиғат апатының саны артуда. Еліміз де үлкен қатерге тап болды. Бірнеше аймақта су тасқыны болып жатыр. Өз сөзінде, Қасым-Жомарт Тоқаев бұған Қазақстан халқы Ассамблеясы да белсенді түрде көмектесіп жатқанын айтты. Өздеріңізге белгілі, тасқын судан зардап шеккен аймақтарға Ассамблеяның республикалық және аймақтық штабтары құрылды. Бүгінде «Жүректен жүрекке» атты аукымды акция жүргізілуде. Өңірлерге 1500 тоннадан астам ең қажетті тауарлар жіберілді, - деді спикер.

Су тасқынымен күреске этномәдени бірлестіктердің 12 мыңға жуық өкілі қосылған. Олар қайырымдылық және гуманитарлық көмек жинауға жәрдем берді. Сонымен қоса, олар жұртты қауіпсіз жерге көшіруге атсалысты.

Ел басына күн туғанда жан-жақтан көмек қолын созу бұл – қазақ халқының және елдегі этнос өкілдерінің бірлігінің көрінісі. Президент еліміздің бірегейлігі, ұлтаралық қарым-қатынас, Отанды сүю, патриоттық сезім жайында мәселелерді  айтты. Сондай-ақ Қасым-Жомарт Тоқаев Атырауда өткен құрылтайдағы негізгі саяси мәселелерді Ассамблея тікелей жүзеге асыру керектігін тілге тиек етті. Сол жақта қабылданған мәселелерді жүзеге асыруға Ассамблея мүшелері белсенді атсалысуы керек деген үлкен мәселені көтерді, - деді ол.

Спикер сессияда Қасым-Жомарт Тоқаев мемлекеттік саясаттың басты өзегі бірлік екенін баса айтқанына тоқталды.

Президент көтерген үлкен мәселелердің бірі – мемлекеттік тілдің алар орны. Өз сөзінде түрлі мәдениетке деген құрмет, мемлекеттік тілді және басқа тілдерді де білу – Қазақстан азаматтарына тән қасиеттер екені айтылды. Тағы бір көтерілген мәселе – кейбір топтардың арасында «Ассамблеяның керегі жоқ» деген сипатта әңгімелер бар. Менің ойымша, бұл айтылған қауесет – орынсыз. Бұған қатысты Президенті «Ассамблея – кейбір адамдар айтып жүргендей, жасанды ұйым емес. Ассамблея – ел бірлігін іс жүзінде орнықтыра түсетін тиімді құрылым. Бүгінде бұл – Конституциялық мәртебесі бар маңызды қоғамдық орган. Ассамблея өте ауқымды қайырымдылық шараларын дер кезінде және жедел ұйымдастырып келеді. Мұның бәрі көп жылдық жүйелі жұмыстың нәтижесі екені сөзсіз»,- деп айтты. Расымен де, Ассамблея мүшелері қайырымдылық жобалары арқылы мұқтаждарға үнемі қолдау көрсетіп келеді. Менің ойымша, бірлігі мықты халықтың күш-қуаты қиын-қыстау уақытта айқын көрініс табады, - деп сөзін түйіндеді Әміржан Әлпейісов.