Қарин қаңтар оқиғасы туралы: Ұлттық апатты болдырмай, жағдайды тұрақтандыра алдық

Мемлекеттік кеңесші Ерлан Қарин өзінің Telegram арнасында осыдан тура бір жыл бұрын болған қасіретті қантар оқиғасына қатысты пікір білдірді, деп хабарлады Elorda.info.

Осыдан бір жыл бұрын қайғылы қаңтар оқиғасы болды. Сол күндері теріс күштер бейбіт шерулерді пайдаланып, жаппай тәртіпсіздіктер ұйымдастырып, мемлекеттік төңкеріс жасауға тырысты. Олардың басты мақсаты - жүргізіліп жатқан жаңашылдықтарға тосқауыл болып, ескі тәртіптерді сақтап қалу еді. Сол сәтте біздің еліміз хаос пен анархияға түсіп кетудің нақты қаупіне тап болды. Әр минут маңызды еді. Бұл уақытта басты мәселе мемлекеттігімізді сақтап қалу болды. Азаматтардың бірлігі мен Президенттің шешуші әрекетінің арқасында мемлекеттік төңкеріс әрекеті сәтсіз аяқталды. Біз ұлттық апатты болдырмай, жағдайды тұрақтандыра алдық, - деп жазды Ерлан Қарин.

Мемлекеттік кеңесшінің айтуынша, ендігі кезекте жоспарланған реформаларды толық жүзеге асыруға кірісуіміз қажет.

Мұндай дағдарыстарды бастан өткерген мемлекеттердің билігі әдетте жағдайды жабық ұстауға, саяси жүйені мығымдауға немесе қатаң тәртіп енгізуге тырысады. Бұл орайда, еліміздегі либерализация мен демократияға бағытталған қозғалыс тоқтап қалмады, керісінше ол үдей түсті. Президенттің бастамасымен елімізде қарқынды және жан-жақты жаңғырту процесі басталды. Мемлекет басшысының стратегиялық бағыты қоғамның қолдауына ие болды. Мұны Конституциялық референдум мен кезектен тыс Президент сайлауының нәтижелері дәлелдейді. Енді біздің алдымызда қоғам бірлігін сақтай отырып, жоспарланған реформалар легін толық жүзеге асыру міндеті тұр, - деп жазды мемлекеттік кеңесші.