Президент шахтадағы қайғылы оқиғадан кейін Қарағанды облысына барды

Мемлекет басшысы Қасым-Жомарт Тоқаев апаттың мән-жайын анықтап, тиісті шешім қабылдау үшін Қарағанды облысындағы қайғылы оқиға орын алған жерге келді, деп хабарлады Elorda.info Ақорданың ресми сайтына сілтеме жасап. 

Бұдан бұрын Денсаулық сақтау министрлігі зардап шеккендерге консультациялық көмек көрсету үшін құрамында токсиколог, травматолог-ортопед және нейрохирург бар жоғары дәрежелі дәрігерлер тобын Қарағандыға жіберетіні белгілі болды.

Зардап шеккен кеншілердің өмірі мен денсаулығын сақтау үшін саланың үздік мамандарын тарта отырып, барлық қажетті медициналық көмек көрсетіледі.

Қазіргі уақытта 18 адам профессор Х. Ж. Мақажанов атындағы көпбейінді ауруханаға жеткізілді, оның 17-сі стационарлық емдеуге жатқызылды, ал 1 зардап шегуші амбулаториялық ем алуда.

Жеңіл және орташа ауырлықтағы улы газдармен уланудан зардап шеккен 15 адам аурухананың токсикология бөлімшесінде емделіп жатыр. Ал бір адамның жағдайы ауыр, қазір ол реанимация және қарқынды терапия бөлімшесіне жатқызылды.

Жағдайы орташа ауырлықтағы тағы бір зардап шегуші травматология бөлімшесінде медициналық көмек алады.