Іздеу 
қаз
Жыл басынан бері Түркияға 4 миллионға жуық турист барған
73 
Түркия осы жылдың қаңтар-ақпан айларында 3,9 миллион шетелдік келушіні қабылдады. Екі айлық кезеңдегі өсу қарқыны өткен жылдың сәйкес мерзімімен салыстырғанда 37,31 пайызға артқан, деп хабарлады Elorda.info.
Түркияны таңдайтын елдер арасында Ресей көш бастап тұр, деп жазады inbusiness.kz. Қаңтар-ақпан айларында бұл елден келушілер саны 507 мыңды құраған. Одан кейін Болгариядан 318 мың және Германиядан 288 мың саяхатшы келген.
Ал осы уақыт ішінде Түркияның қалалары арасында ең көп турист қабылдаған шаһар - Ыстанбұл. Қаңтар айында ғана 1,2 миллион турист келген. Екінші орында - Анталья. Бұл қала 1-қаңтар мен 9-сәуір аралығында 1 миллионнан астам саяхатшыны қабылдаған. Осылайша, Антальядағы өткен жылғы туристік рекорд екі апта бұрын жаңартылды. Туристердің көбі Ресей, Германия, Ұлыбритания және Польшадан барды.
Сонымен қатар Қазақстаннан Түркияға жыл сайын орта есеппен 500 мың турист келеді деген ақпарат бар.
Зілзаладан соң туристер Түркияны таңдай ма деген сұрақ туындаған еді. Алайда жоғарыдағы көрсеткіштерге қарағанда келушілердің қарқыны бәсеңдемеген секілді.
Өткен жылы туристер саны ең көп елдердің үштігіне Франция, Испания және Түркия кіргенін хабарлаған едік. Бұл ел 51 миллионнан астам саяхатшыны қабылдаған. Сөйтіп, турист саны 50 миллионды құраған АҚШ пен Италияны басып озған.
