Еуропалық комиссия Шенген визасын алу рәсімін өзгертуді ұсынды

Көші-қон және баспана туралы жаңа пактіде 2025 жылға қарай визалық процедураларды толығымен цифрландыру мақсаты қойылды. Бұл ЕО-ға мүше мемлекеттер мен өтініш берушілерге шығындар мен жүктемені азайту есебінен процесті жақсартады, өңірдегі қауіпсіздікті арттырады деп болжанып отыр.

Еуропалық комиссияның мәліметінше, цифрландыру алаяқтыққа, жалғандыққа және ұрлыққа ұшырауы мүмкін жеке виза жапсырмаларымен байланысты тәуекелдерді азайтуы керек.

Осылайша, виза алу процесі мынадай болуы мүмкін: тілек білдірушілер онлайн режимде өтініш береді және виза ақысын ЕО-ның бір платформасы арқылы төлейді. Өтініш алынғаннан кейін, платформа ЕО-ның қай мемлекеті оны қарау үшін жауап беретінін автомат түрде анықтайды. Сонымен қатар, платформа өтініш берушілерге қысқа мерзімді Шенген визалары және талаптар мен процедуралар туралы ақпарат береді.