00:00
Астана -10oC
USD:
457.98
EUR:
490.86
RUB:
5.26
Іздеу

Елордада химия және биология пәндерінен республикалық олимпиада жеңімпаздары марапатталды

Елордада  химия және биология пәндерінен республикалық  олимпиада жеңімпаздары марапатталды
фото: Elorda.info.

Бүгін елордадағы әл-Фараби атындағы Оқушылар сарайында химия және биология пәндері бойынша 7-8 сыныптар арасында республикалық олимпиаданың жеңімпаздары марапатталды, деп хабарлады  Elorda.info.

13 мамырда басталған олимпиаданы «Дарын» республикалық ғылыми-практикалық орталығының қолдауымен, «Астана дарыны» дарынды балалар мен талантты жастарды анықтау және қолдау орталығы мен «ZERDE-LIDER» білім беру орталығы бірлесе ұйымдастырған.

«Астана дарыны» дарынды балалар мен талантты жастарды анықтау және қолдау орталығының басшысы Жанар Бейсенбаеваның сөзінше, аталмыш олимпиадаға еліміздің 13 өңірінен 100-ге жуық оқушы қатысқан.

«Бұл олимпиада үшінші жыл қатарынан өтіп жатыр, ал республика деңгейінде екінші жыл ұйымдастырылды. Басты мақсатымыз оқушыларды келесі жылы өтетін республикалық 9-11 сынып аралығындағы олимпиадаға дайындау. Бұл білім сайысы практикалық кезеңімен ерекше. Себебі басқа олимпиадаларда балалардың тек теориялық білімі тексеріледі. Қатысушыларға келетін болсақ, олимпиадаға еліміздің 13 өңірінен балалар қатысты. Оның ішінде астаналық оқушылар да бар. Атап айтқанда  әр өңірден 8 оқушыдан, жалпы 98 оқушы өзара сынға түсті»,- дейді орталық басшысы Жанар Бейсенбаева.

Ұйымдастырушылардың айтуынша, олимпиаданың мақсаты химия және биология пәндерін тереңдетіп оқуға оқушылардың қызығушылықтарын арттыру, олимпиадаларға дайындық жүйесін жоғары деңгейде жетілдіру және олимпиадалық резервті қалыптастыру.

«Балалар арасында бұл пәндерге деген қызығушылық жоғары, себебі химия мен биологияға қызығушылығы бар оқушылар болашақ дәрігер, микробиолог және биоинженер деп айтуға болады. Дарынды оқушыларды қолдауда әрқашан демеушілік көмек көрсетіп жүрген әлемдегі ең ірі мұнай компаниясы Exxon Mobil компаниясына алғысымызды білдіреміз. Бұл компания әлеуметтік және білім беру жобаларын белсенді түрде қолдап келеді. Бүгінгі қорытынды жиында үздік оқушылар және жақсы нәтиже көрсеткен командалар да марапатталды»,- дейді Жанар Бейсенбаева.

Жалпы олимпиада 2 кезең бойынша өтті. Бірінші кезең теориялық форматта өтсе, екінші кезеңде оқушылардың практикалық білімі шыңдалды. Практикалық тур химия пәні бойынша Л.Гумилев атындағы Еуразия  ұлттық университеті базасында, биология пәнінен Қадыр Мырза Әлі атындағы BINOM SCHOOL мектеп - лицейінде өтті.

Олимпиадаға қатысқан елордалық Нұрхат Мақсат болашақта биоинженер болуды армандайды.

«Мен бұл олимпиадаға екінші жыл қатарынан қатысып тұрмын. Бұл сайысқа команда болып барлығымыз бірге дайындалдық. Басқа қалалардан келген оқушылар да мықты деп айта аламын. Барлығы қызықты болды»,- дейді елордалық оқушы.

Айта кетейік, жеңімпаздар мен жүлдегерлер «Дарын» республикалық ғылыми-практикалық орталығының I, II және III дәрежелі дипломдарымен және грамоталарымен, сондай-ақ Exxon Mobil демеуші компаниясы ұсынған бағалы сыйлықтармен марапатталады. Олимпиадаға қатысқан барлық оқушыға сертификаттар табысталады.

Барлық жаңалықтар