Елдегі қай өңірлерге шетелдік туристер көп барады?

Туризм және спорт министрлігі шетелдік туристерді ең қөп қабылдаған еліміздегі ТОП-5 қаланы ұсынды.

Шетелдік туристер арасында еліміздің оңтүстік астанасы туристік өңір ретінде кең танымал. Мәселен, 2023 жылғы алғашқы тоғыз айда Алматыға 409 394 адам саяхаттап барған. Осылайша, Алатау баурайындағы ару қала Алматы шетелдік туристерді ең қөп қабылдайтын еліміздегі қалалардың көшін бастады.

Алматы шетелдіктер үшін тау-шаңғы курорттарымен, сұлу табиғатымен, қолайлы ауа райымен тартымды. Жуырда әйгілі италиялық Condé Nast Traveller Italia басылымы Алматыдағы Шымбұлақ тау шаңғы курортын әлем саяхатшылары міндетті түрде баруға тиіс ТОП-5 орынның бірі ретінде ұсынса, америкалық New York Times нұсқасы бойынша Алматы 2024 жылы баруға тұрарлық 52 орын тізіміне енген болатын.

Екінші орынға ел ордасы – Астана жайғасты. Еліміздің бас қаласына шетелдіктер іскерлік туризм бойынша жиі келеді. Былтырғы 9 айда Астанаға 220 000 шетелдік қонақ келген. Рейтингтің үшінші орнына Маңғыстау облысы жайғасты. Қарт Каспийдің жағасында орналасқан Ақтауға былтырғы қаңтар-қыркүйек аралығында 34 435 шетелдік саяхатшының табаны тиген.  

Үздік бестіктің қатарына Атырау облысы мен Шымкент қаласы енді. Өткен жылдың алғашқы 9 айында мұнайлы өлкеге 24 431 шетелдік турист барса, еліміздің үшінші мегаполисіне 20 837 шетелдік турист саяхаттаған.

Еліміздің туристік әлеуеті мен дәстүрлі қонақжайлығының арқасында Қазақстан шетелдіктер арасында әлемдегі ең танымал туристік бағыттардың біріне айналып келеді. Қазіргі таңда елімізге 74 елдің өкілдері визасыз келе алады. Алдағы уақытта бұл көрсеткішті 100-ге дейін жеткізуді жоспарлап жатырмыз. Бұдан бөлек, 28 елмен 120 маршрут бойынша халықаралық әуе қатынасы жолға қойылған, - деді Туризм индустриясы комитеті төрағасының м.а. Нұртас Кәріпбаев.