Астанада ұлттық пікірсайыс турнирі өтеді

Оқу-ағарту министрлігі 16-17 ақпанда Алғыс айту күніне арналған ұлттық пікірсайыс турнирін өткізеді. Онда 120 спикер бақ сынайды, деп хабарлады Elorda.info.

Ұлттық пікірсайыс турнирінің аудандық, қалалық, облыстық кезеңдері өтті. Оған қазақ, орыс және ағылшын лигаларынан 43 мың пікірсайысшы қатысты. Финалға Астана, Алматы және Шымкент қалаларынан 120 спикер жолдама алды. Олар білім беру ұйымдарының 9-11 (12) сынып оқушылары.

Бағдарлама бойынша «Бірлік» танысу кеші, ынтымақтастыруға арналған тренинг, «Quiz, Please» ойын-сауық шарасы, турнир қатысушыларының әсері туралы блиц-сұхбат, экскурсия ұйымдастырылады. Жеңімпаздар І, ІІ, ІІІ дәрежелі диплом, сыйлықтармен, үздік спикерлер – дипломдармен, команда жаттықтырушылары – алғыс хаттармен марапатталады, - дейді Оқу-ағарту министрлігі Республикалық қосымша білім беру оқу-әдістемелік орталығының директоры Раиса Шер.

Ұлттық пікірсайыс турнирінің қорытынды кезеңі Әл-Фараби атындағы Оқушылар сарайында болады. Сайыстың барлық кезеңі американдық парламенттік формат (AПФ) бойынша өткізіледі.

Айта кетейік, қазіргі күні республика бойынша 6 726 пікірсайыс клубы жұмыс істейді. Онда 120 мыңнан астам оқушы құқықтық мәдениетті, азаматтық белсенділікті, жауапкершілікті, шығармашылық және сыни ойлауды, командада жұмыс істеуді үйренеді.