Шарында Қызыл кітапқа енген сілеусін фототұзаққа ілінді

Алматы облысында Қызыл кітапқа енген сілеусін фототұзаққа ілініп қалды, деп хабарлады Elorda.info Экология және табиғи ресурстар министрлігінің баспасөз қызметіне сілтеме жасап.

Экология министрлігінің мәліметіне сүйенсек, бұл аң соңғы екі жылда алғаш рет Шарын ұлттық паркіндегі Бұғыты тау учаскесіне орнатылған фототұзақ объективіне түсіп қалған.

Бұл жыртқыш негізінен түнде белсенді, оңай әрі ешбір дыбыс шығармай қозғалады. Ал терісінің ала болып келуі, ағаш арасына оңай жасырынуына көмектеседі, күн сәулесінен түскен жарықтан сүтқоректі көзге байқалмай қалады, - делінген хабарламада.

Айта кетсек, шабуылдауға дайындалған мысықтұқымдас жыртқыш  4 метрге дейін секіре алады. Ал сілеусіннің ересек дарағы бір күнде 30 шақырымға дейінгі қашықтықты еңсере алады.