17 мың жолаушы теміржол билетін «Күту парағы» арқылы сатып алды

Жыл басынан бастап bilet.railways.kz сайтындағы «Күту парағы» қызметі пайдаланушыларға 50 мыңнан астам бос орын ұсынған. Солардың ішінде 17 мың адам теміржол билетін сатып алды, деп хабарлады Elorda.info ҚТЖ-ға сілтеме жасап.

«Күту парағы» қызметі билет болмаған жағдайда жолаушыға бос орынға кезекке тұруға мүмкіндік береді. Мұны пойыз жөнелтілгенге дейін 7 күннен және 2 сағаттан кешіктірмей жасауға болады.
Кезек автоматты түрде, адамдардың қалыптастыруынсыз жүргізіледі. Бұл шаралар заңсыз әрекетті болдырмау мақсатында, сондай-ақ, онлайн қызметке өзгерістер енгізбеу үшін қолданылады.

Жүйеде енгізілген билет сатудың жаңа механизмдерінің арқасында бос орындарды «ұстап алу» мүмкін емес. Егер кассир 30 секунд ішінде 5 бірдей сұраныс жасаса, билет сату жүйесі бұғатталады. Егер ол бірдей сұраныстарды жіберуді тоқтатпаса, үш сұраныстан кейін бағдарлама кассирді 5 минутқа бұғаттау мүмкіндігі туралы ескертеді. Осылайша, кассир орындарды «ұстап» ала алмайды.

«Күту парағы» қызметін пайдалану тәсілі:

1. Bilet.railways.kz. сайтына тіркеліп, жеке кабинетке кіріңіз;

2. Егер қажетті маршрутқа билет болмаса, парақшаның соңында «Күту парағына тұру» бөлімін таңдаңыз;

3. Қажетті бағыт пен пойыз нөмірін, сондай-ақ, жеке басын куәландыратын құжаттың деректерін және электрондық пошта мекенжайын көрсету арқылы «Күту парағына» өтінімді толтырыңыз;

4. Бос орын пайда болған жағдайда, сіздің жеке кабинетіңізге немесе SMS-хабарлама билетті сатып алу қажеттілігі туралы ақпарат келеді.

Сондай-ақ, жолаушылар «Күту парағы» қызметін «Жолаушылар тасымалы» АҚ билет кассасына жүгіну арқылы пайдалана алады.