Елімізде бір аптада 12 адам қар құрсауынан құтқарылды

Биыл қыс басталғалы қар құрсауында қалған 75 адам эвакуацияланды, деп хабарлады Elorda.info ТЖМ Апаттар медицинасы орталығына сілтеме жасап.

Қыс басталысымен Апаттар медицинасы орталығының трассалық медициналық-құтқару пункттерінің республика жолдарындағы жол-көлік оқиғаларына шығуы, сондай-ақ автокөліктің сынуына байланысты жолаушыларды эвакуациялауы жиілеп кеткен.

ҚР ТЖМ Апаттар медицинасы орталығы ММ хабарлауынша, тек өткен аптада трассалық медициналық-құтқару пункттерінің бригадалары 12 адамды эвакуациялаған, оның ішінде 9-ы – Өзбекстан, 1-уі – Тәжікстан, 2-уі – Қазақстан азаматтары.

Мәселен, 21 қарашада Қарағанды облысының «Ақсу-Аюлы» ТМҚК қызметкерлері «Қайрат» дәмханасына бұзылған автокөліктен 2 адамды эвакуациялады. Сондай-ақ 24 қарашада сағат 3.12-де «Шығанақ» трассалық пунктіне Меркі-Бурылбайтал трассасында жолаушылар тиеген автобустың бұзылып қалғаны туралы ақпарат түсті. Тоңып қалған адамдарға көмек көрсетуге ТМҚП шұғыл әрекет ету бригадасы шықты. Барлық жолаушыны дәрігерлер тексерді, 10 адам «Айғаным» дәмханасына эвакуацияланды, - дейді ведомство өкілдері.

Айта кетейік, Қазақстанда авариялық-қауіпті жол учаскелерде ТЖМ бөлімшесі – 40 трассалық медициналық-құтқару пункті (ТМСК) қызмет көрсетеді.