Алтай Көлгінов жауын-шашын кәрізінің құрылыс барысымен танысты

0
75
фото А.Көлгінов/ instagram

 

Елорда әкімі Алтай Көлгінов қалада салынып жатқан жауын-шашын кәрізінің құрылыс барысымен танысты, деп хабарлайды Елорда Инфо.

Құрылыс қарқынын ескере отырып, жауын-шашынға арналған кәріздер мен тазарту қондырғыларын уақытында салу қажет. Қалада бірнеше проблемалық учаске бар, олар бойынша жұмыс істеп жатырмыз. Бүгін мәслихат депутаттары және қоғамдық кеңес мүшелерімен бірге бірқатар жауын-шашын кәрізінің құрылыс барысымен таныстық. Қазір қалада 3 ірі кәріз желісі мен тазарту қондырғысын салып жатырмыз. Бұл мәселе ел басшылығының бақылауында.

Бірінші. Б.Момышұлы даңғылындағы проблемалық учаскесінде орналасқан жауын-шашын кәрізінің магистралды коллекторының құрылысын аяқтаймыз. Бұл жауын-шашын су кәрізінің ұзындығы – 500 метр, Дауылпаз көшесінен Елім-ай көшесіне дейін жалғасады (Б.Момышұлы даңғылынан өтеді). Жаңа құрылыс қазіргі жауын-шашын су кәрізі желілерінің су өткізу мүмкіндігін бір жарым есе арттырады.

Екінші. Бұған қоса «Молодёжный» шағын ауданында (Тәшенев пен Амман көшелерінің қиылысы) тазарту қондырғыларын салып жатырмыз. Ол жердегі коллекторларды да толық қалпына келтіреміз. Бұрын бұл жер батпақты болған.

Бұл қондырғылардың айырмашылығына келсек, олар жаңбыр және қар суын Есіл өзеніне жібермес бұрын тазартуға мүмкіндік береді. Бұрын су ағыны тікелей өзенге ағатындықтан, өзенді ластап, қала экологиясына зиян тигізетін. Бұл құрылысты 2021 жылы аяқтауды жоспарлап отырмыз. Бірақ бірінші кезең – су тазартуды биыл күзде іске қосамыз.

«Молодежный» шағын ауданындағы жаңа қондырғылардың қуаты тәулігіне 42 мың текше метр. Бұл тазарту қондырғылары Тәшенев, Бараев, Уәлиханов, Иманбаева көшелері мен Республика даңғылының су басуына жол бермейді. Себебі тазарту қондырғысы жер астында салынып, оның үстінен абаттандырылған, көгалдандырылған сквер салынады.

Үшінші. Биыл соңына дейін Тельман тұрғын алабында тазарту қондырғылары мен магистралды коллектор құрылысы бойынша жұмысты аяқтаймыз. Оның қуаты тәулігіне 36 мың текше метрді құрайды. Жобаны жүзеге асыру жер бетіндегі суағарлардың бұрылуын қамтамасыз етуге мүмкіндік береді. Ол Тельман тұрғын алабы мен №27 көшесінің бойын қамтиды.

Төртінші. Биыл Пригородный тұрғын алабы мен Алаш тас жолы бойындағы логистика орталығы ауданында тазарту қондырғыларын салдық.