Өңірлер жаңалығы

ҚР Премьер-министрі Асқар Мамин жұмыс сапарымен Семейге барды

08 қазан, 20:0344
Автор: Elorda Aqparat
Фото Премьер-министрдің баспасөз қызметінен Фото Премьер-министрдің баспасөз қызметінен

Семей қаласына жұмыс сапары аясында ҚР Премьер-министрі Асқар Мамин қала активімен Семей қаласының әлеуметтік-экономикалық дамуының 2020-2025 жылдарға арналған Кешенді жоспарын іске асыру мәселелері, сондай-ақ Абайдың 175 жылдығын атап өтуге дайындық жөнінде кеңес өткізді, деп хабарлайды Елорда Инфо ҚР Премьер-министрі баспасөз қызметіне сілтеме жасап.

Семей қаласының әлеуметтік-экономикалық даму нәтижелері және 2025 жылға дейінгі жоспарлар туралы қала әкімі Ермак Сәлімов, бірінші қаржы вице-министрі Б. Шолпанқұлов, Ұлттық экономика вице-министрі Е. Алпысов, Индустрия және инфрақұрылымдық даму вице-министрі Б. Қамалиев баяндады.

Семей қаласының әлеуметтік-экономикалық дамуының 2020-2025 жылдарға арналған Кешенді жоспарында 56 іс-шараны іске асыру қамтылған, оған 260,2 млрд теңге қаржы қарастырылған. Оның ішінде республикалық бюджеттен – 98,5 млрд теңге, жергілікті бюджеттен – 85,5 млрд теңге, 76,1 млрд теңге көлеміндегі жеке инвестициялар қарастырылған. Инвестициялар кәсіпкерлікті дамытуға, АӨК, тұрғын үй құрылысына және инженерлік-коммуникациялық инфрақұрылымға, тұрғын үй-коммуналдық шаруашылығына, әлеуметтік және көлік инфрақұрылымына бағытталатын болады.

Фото Премьер-министрдің баспасөз қызметіненФото Премьер-министрдің баспасөз қызметінен

Кешенді жоспар шараларын іске асыру 2025 жылға қарай ЖІӨ 1,6 есеге арттыруға (нақты мәнінде) немесе номиналды мәнінде 300 млрд теңгеге дейін жеткізуге мүмкіндік береді. 4 мыңнан аса жаңа жұмыс орындары құрылады, ауыл шаруашылығы өнімдерінің көлемі 19%-ға ұлғайып, 43 млрд теңгені құрайтын болады. 133 көпқабатты немесе 702,9 мың шаршы метр тұрғын үйді пайдалануға беру және орташа өмір сүру ұзақтығын 75 жасқа дейін жеткізу жоспарланған. 2025 жылдың қорытындысы бойынша жақсы және қанағаттанарлық күйдегі жолдардың үлесі 73,6 пайыздан 95 пайызға дейін жеткізілетін болады.

«Семей еліміздің мәдени және рухани мұрасында және Қазақстанның тәуелсіз тарихында ерекше орын алады. Елбасы Н. Назарбаев бұл өңірге, Семей қаласына, ерекше қамқорлықпен қарайды. Бұған дейін Елбасының тапсырмасы бойынша Семей қаласының әлеуметтік-экономикалық дамуының 2013-2017 жылдарға арналған Кешенді жоспары қабылданған болатын. Осы жоспарды және басқа да бағдарламаларды іске асыру есебінен соңғы бес жылда өнеркәсіптік өндіріс көлемі 38 пайызға, ауыл шаруашылығы өнімдері – 63 пайызға, бөлшек саудадағы тауар айналымы – 1,6 есе, негізгі капиталға инвестициялар – 1,4 есе, бюджет көлемі – 1,8 есе ұлғайды. Соңғы жылдары сонымен қатар тұрғындар санының өсуінде оң динамика байқалып отыр», – деді А. Мамин.

Премьер-министр Үкіметтің қаланың әлеуметтік-экономикалық дамуына және тұрғындардың өмір сүру сапасын арттыруға ерекше көңіл бөліп отырған Президент Қ. Тоқаевтың тапсырмасы бойынша Семей қаласының әлеуметтік-экономикалық дамуының 2020-2025 жылдарға арналған жаңа Кешенді жоспарын мақұлдағанын атап өтті.

Фото Премьер-министрдің баспасөз қызметіненФото Премьер-министрдің баспасөз қызметінен

Үкімет басшысы Кешенді жоспарда қарастырылған іс-шараларды уақтылы әрі сапалы орындау бойынша тиісті шараларды қабылдауды, сондай-ақ қаражаттың уақтылы әрі тиімді жұмсалуын бақылауды қамтамасыз етуді тапсырды.

2020 жылы Абайдың 175 жылдық мерейтойын атап өту туралы айта отырып, Асқар Мамин Үкіметтің халықаралық, республикалық және өңірлік деңгейлерде 500-ден аса іс-шараны қамтитын жоспардың орындалуына ерекше бақылау орнататынын атап өтті.

«Ел Президенті мерейтойды мемлекеттік деңгейде атап өтетінімізді айтты. Абайдың отанына әлемнің түпкір-түпкірінен қонақтар келеді. Сондықтан біздің басты міндетіміз – барлық жоспарланған шараны лайықты түрде ұйымдастырып, өткізу», – деді Премьер-министр.

ҚР Тұңғыш Президенті – Елбасы Нұрсұлтан Назарбаев бастамашы болған «Нұрлы жер» және ИИДМБ іске асырылуын бақылау, сондай-ақ Мемлекет басшысы Қ. Тоқаевтың Семей қаласын әлеуметтік-экономикалық дамыту бойынша тапсырмаларын орындау аясында Асқар Мамин «СемАз» ЖШС және «Daewoo Bus Kazakhstan» автомобиль құрастыру кәсіпорындарының жұмысымен, «Абай Арена» мәдени-спорт кешенінің салыну барысымен, сондай-ақ «Қарағайлы» ықшам ауданында көпқабатты тұрғын үйлердің құрылысымен танысты. 

Фото Премьер-министрдің баспасөз қызметіненФото Премьер-министрдің баспасөз қызметінен



Еlorda Aqparat Telegram парақшасына жазылыңыз 




Наверх