Спорт

«Астана» футбол клубы төрт рет қатарынан Қазақстан чемпионы атанды

Футболдан 2017 жылғы Қазақстан чемпионатының соңғы турында өз алаңында Оралдың «Ақжайық» командасын жеңген «Астана» қатарынан төртінші жыл Қазақстан чемпионы атанды. Тартысты өткен қорытынды 33-турда екі бірдей орталық кездесу өтті. «Астана Аренада» «Астана» мен «Ақжайық», Алматыда жергілікті «Қайрат» пен «Ақтөбе» командалары биылғы Премьер-лиганың алтын және күміс жүлдегерлерін анықтады. Бірінші таймнан соң «Астана» — «Ақжайық» матчында есеп ашылмады. Үзілісте Станимир Стойлов шәкірттерін жеңіске жігерлендіріп, елордалық команда қонақтарды барынша қыспаққа алды. Қысымнан көз ашпаған оралдықтардың қорғанысы екінші таймның басында-ақ қателік жіберіп, 51-минутта оны сәтті пайдаланған Джуниор Кабананга шеберлікпен есеп ашты. «Астана» алаңда толық үстемдік құрып, тағы да бірнеше рет гол соғатын мүмкіндікке ие болды. «Астананың» чемпиондық ойыны 1:0 есебіндегі жеңіспен аяқталды. Алматыдағы ойынның бірінші таймында алматылықтар сапында Сезар Арзо гол соғып, «Қайратты» алға алып шықты, бірақ ол кейіннен автогол ретінде Ж. Наненің есебіне жазылды. Өз қолдарынан келгеннің бәрін істеуге бел буған алматылықтар «Ақтөбе» қақпасына тағы да екі гол соқты, оған алаң қонақтары 60-минутта екі голымен ғана жауап қайтарды. Ойын 3:2 есебімен аяқталды. Осылайша, «Қайрат» 78 ұпаймен екінші орында қалса, «Астана» футбол клубы 79 ұпаймен Қазақстанның төрт дүркін чемпионы атанды.


comments powered by HyperComments
Close