Оқу-ағарту министрі мектеп түлектеріне үндеу жасады

Түлектер үшін «Соңғы қоңырау» 25 мамырда, ал 1-10 сынып оқушылары үшін 24 мамыр күні сынып сағаттары өтеді. Бұл туралы бүгін Оқу-ағарту министрі Ғани Бейсембаев мәлімдеді, деп хабарлады Elorda.info.

 «Биылғы оқу жылы 25 мамырда аяқталатынын қатаң ескертемін. Осыған орай, оқу бағдарламаларын жыл бойына табысты меңгерген 3,8 миллионнан астам еліміздің оқушылары, келесі сыныптарға көшірілсін. Мектептің 1-10 сынып оқушыларына «Білімім Отаныма» тақырыбындағы Бірыңғай сынып сағаттарын өткізу 24 мамыр жұма күніне жоспарлансын. Бұл былтырғы жылдың қыркүйек айында енгізілген «Біртұтас тәрбие бағдарламасы» шеңберінде қабылданған жоспарға сәйкес ұйымдастырылуы тиіс», - деді Ғани Бейсембаев.

Сонымен қатар министр «Ынтымақ айы» шарасы аясында «Таза Қазақстан», «Игі істер», «Каникулда кітап оқиық» және т.б. шаралары өтетінін хабарлады.  

«Еліміздегі 186 мың мектеп бітірушілері үшін оқу жылының аяқталуына арналған «Соңғы қоңырау» іс-шарасын 25 мамырда өткізуді тапсырамын. Биылғы жылдың түлектері аталған іс шараны жоғары мәдениеттілікпен, ысырапшылдықсыз, даңғазалықсыз, рухани-адамгершілік деңгейінде өткізетіндіктеріне сенімдімін. Бұл болашақ түлектер үшін өнегелі дәстүрге айналған жаңа форматтағы жоғары мәдениетті алғашқы шара болары сөзсіз. Оқу жылын аяқтауды сапалы ұйымдастыру және қауіпсіздік шараларын сақтау бойынша өңірлік білім басқармаларының басшыларына дербес жауапкершілік жүктеймін», - деп жазды сала басшысы.